იმპორტიორებს, რომლებსაც რუსეთიდან ხორბალი შემოაქვთ, შესაძლოა, პრობლემები შეექმნათ

იმპორტიორებს, რომლებსაც რუსეთიდან ხორბალი შემოაქვთ, შესაძლოა პრობლემები შეექმნათ. როგორც რუსული მედია იუწყება, რუსეთის სანიტარული სამსახური როსტოვსა და კრასნოდარში რამდენიმე ხორბლის გადასატვირთი მოედნის დახურვას აპირებს, ამ მიზნით აღნიშნული უწყების ხელმძღვანელი სერგეი დანკვერტი სასამართლოს მიმართავს.
საქმე ეხება როსტოვში ხუთი-ექვსი მოედნის დახურვას, ხოლო კრასნოდარში ეს რიცხვი ჯერ დასაზუსტებელია. როგორც დანკვერტი აცხადებს, ბევრი მოედანი და ელევატორი დარეგისტრირებული არ არის, შესაბამისად ისინი გადასახადებს არ იხდიან. 
„გადასატვირთი მოედნები და ელევატორები რეგისტრირებული უნდა იყოს. სახელმწიფომ უნდა იცოდეს რა რაოდენობის ხორბალი აქვს. ყველამ უნდა გადაიხადოს გადასახადი ხორბლის მწარმოებლიდან მის ბოლო მიმღებამდე“ – აცხადებს რუსეთის სანიტარული სამსახურის უფროსი. მან ასევე ისაუბრა საქართველოში ხორბლის ექსპორტზეც.

ჩვენ დავიწყეთ იმ მოედნების კონტროლიც, საიდანაც ხორბალი ექსპორტზე გადის. სტავროპოლის ტერიტორიაზე მეწარმე იღებს შიდა დოკუმენტს, ჩამოდის ჩრდილო ოსეთში, ჩატვირთავს ხორბალს და მიაქვს საქართველოში. ამ გზით რუსეთიდან საქართველოში, ყოველწლიურად, მანქანებით 350-400 ათასი ტონა ხორბალი ხვდება. ქართველები მიხვდნენ, რომ ამ გზით ანგარიშსწორება ნაღდი ფულით ხდება, რადგან ჩვენთან არ არსებობს შესაბამისი აღრიცხვის სისტემა“ – აცხადებს რუსეთის სანიტარული სამსახურის უფროსი.

ავტორი: მაია ბიწაძე

კომენტარის დატოვება

თქვენი ელფოსტის მისამართი გამოქვეყნებული არ იყო.