ისწავლეთ მცენარის ენა _ რას „გვთხოვს“ პომიდორი?

პომიდვრის კულტურა გარემო პირობებისა და კვების რეჟიმის მიმართ საკმაოდ მგრძნობიარეა. ხშირად, მცენარე თავად ხდება საკუთარი მდგომარეობის „ინდიკატორი“.

პომიდვრის ამ სიმპტომების სწორი წაკითხვა და დიაგნოსტიკა საშუალებას გვაძლევს, დროულად ჩავერიოთ პროცესში, აღმოვფხვრათ პრობლემა და უზრუნველვყოთ მცენარის ჯანსაღი განვითარება.

ნაყოფზე, ფოთოლსა თუ ღეროზე გაჩენილი ნიშნები ხშირად საკვები ელემენტების დეფიციტზე ან დაავადებაზე მიგვანიშნებს. მათი დროული ამოცნობა მოსავლის გადარჩენის საწინდარია.

სიმპტომები ნაყოფზე

• კალციუმის (Ca) დეფიციტი: ნაყოფის წვეროს სიდამპლე — პომიდვრის ფუძეზე ჩნდება მუქი, ჩაზნექილი ლაქა, რომელიც ცნობილია როგორც „შავი ტაკო“.
• კალიუმის (K) დეფიციტი: არათანაბარი დამწიფება — ნაყოფს უჩნდება ყვითელი ან მწვანე „მხრები“, რომლებიც არ წითლდება.
• ბორის (B) დეფიციტი: ნაყოფის ზედაპირზე კორპისებრი ლაქები და შიდა ბზარები.
• წყლის დეფიციტი/სტრესი: რადიალური ან კონცენტრირებული ბზარები ნაყოფის კანზე, რაც განსაკუთრებით ძლიერი წვიმის შემდეგ ვლინდება.

სიმპტომები ფოთლებზე

• აზოტის (N) დეფიციტი: ძველი ფოთლების (ქვემოდან ზემოთ) თანაბარი გაყვითლება; მცენარე ფერმკრთალია და სუსტად იზრდება.
• ფოსფორის (P) დეფიციტი: ფოთლის ქვედა მხარე იღებს მოიისფრო-ვარდისფერ შეფერილობას, რაც განსაკუთრებით დაბალი ტემპერატურის დროს ვლინდება.
• კალიუმის (K) დეფიციტი: ძველი ფოთლების კიდეები ხმება და იბრაწება, დაზიანება ნელ-ნელა ფოთლის შუა ნაწილისკენ ვრცელდება.
• მაგნიუმის (Mg) დეფიციტი: ძველ ფოთლებზე ძარღვთაშორისი დაქლოროზი (გაყვითლება) — ძარღვები მწვანე რჩება, მათ შორის სივრცე კი ყვითლდება.
• კალციუმის (Ca) დეფიციტი: ახალი ფოთლები დეფორმირებულია, ნაპირები კი დამწვარი და დახვეული.

სიმპტომები ღეროსა და ფესვთა სისტემაზე

• ფოსფორის (P) დეფიციტი: იისფერი ღერო და ზრდის მკვეთრი შეფერხება.
• ფუზარიოზი (სოკოვანი დაავადება): ღეროს შუაზე გადაჭრისას ჩანს შიდა გამტარი ჭურჭლების გამუქება/გაშავება.
• ნემატოდები: ფესვებზე ჩნდება მომრგვალებული კვანძები (მარცვლები); მცენარე ჭკნება მაშინაც კი, როცა ნიადაგი ტენიანია.
• ნიადაგის სიმკვრივე: ფესვები არის ზედაპირული და სუსტად დატოტვილი.

ამგვარად, პომიდვრის ვიზუალური დათვალიერება საუკეთესო გზაა ბაღში არსებული ფარული პრობლემების გამოსავლენად. იქნება ეს ფოთლის შეფერილობის ცვლილება თუ ნაყოფის დეფორმაცია, თითოეული ნიშანი მიგვანიშნებს კონკრეტულ საჭიროებაზე — ნიადაგის განოყიერებაზე, მორწყვის რეჟიმის მოწესრიგებაზე თუ მავნებლებთან ბრძოლაზე. ამ დეტალების გათვალისწინება გარანტიაა იმისა, რომ მივიღებთ არა მხოლოდ უხვ, არამედ ხარისხიან და ჯანსაღ მოსავალს.

აგრონომი გირჩევთ: დარგვამდე ნიადაგის ანალიზი და ვეგეტაციის პერიოდში ფოთლოვანი (ფოლიარული) კვება ყველაზე საიმედო გზაა ხარვეზის აღმოსაფხვრელად და საჭირო დოზების კორექტირებისთვის.