კოლხური ხოხობი ბაღდათშიც გამრავლდება
საქართველოში ბუნებრივი ფაუნის აღდგენისა და შენარჩუნების პროცესში კოლხური ხოხობი ერთ-ერთ მთავარ სიმბოლოდ იქცა. წითელ წიგნში შეტანილი ეს უნიკალური ფრინველი კვლავ ბრუნდება ბუნებაში – ბაღდათის მუნიციპალიტეტი გახდა მორიგი ადგილი, სადაც ხოხობების რეინტროდუციის პროგრამა წარმატებით განხორციელდა.
ველური ბუნების ეროვნული სააგენტოს მხარდაჭერით და ბაღდათის მუნიციპალიტეტის მერიის ინიციატივით, მუნიციპალიტეტის ტერიტორიაზე კოლხური ხოხობები გაუშვეს.
200 ფრთა ხოხობი ორ სოფელში – ობჩასა და ვარციხეში გაუშვეს, სადაც სპეციალისტებმა ფრინველების ბუნებრივი ცხოვრებისთვის საჭირო პირობები წინასწარ შეაფასეს და შესაბამისი გარემო შეარჩიეს.
ხოხბების პარტია ბაღდათის მუნიციპალიტეტს საჩუქრად საქველმოქმედო ფონდმა „ქართუმ“ გადასცა, რომლის დამფუძნებელი ბიძინა ივანიშვილი და მისი ოჯახი უკვე მრავალი წელია საქართველოში უნიკალური და იშვიათი ფრინველთა სახეობების აღდგენის პროექტებს აფინანსებენ.
მათი მხარდაჭერით, წითელ წიგნში შეტანილი კოლხური ხოხობი, რომელიც წლების განმავლობაში გადაშენების პირას იყო, ეტაპობრივად ბრუნდება ბუნებრივ გარემოში.
სპეციალისტების შეფასებით, ბოლო წლებში ქვეყნის სხვადასხვა რეგიონში უკვე რამდენიმე ათასი კოლხური ხოხობი იქნა გაშვებული, რაც ქართული ფაუნის მდგრადობისთვის უაღრესად მნიშვნელოვანი საქმეა.
ბაღდათის მაგალითი ნათლად აჩვენებს, რომ ბუნების დაცვისა და აღდგენის პროცესში ადგილობრივი ხელისუფლების, სამთავრობო უწყებებისა და კერძო სექტორის თანამშრომლობა შედეგიანად მუშაობს.
კოლხური ხოხობის დაბრუნება ქართულ ტყეებსა და ველებზე მხოლოდ ეკოლოგიური პროექტი კი არა, ეროვნული მნიშვნელობის საქმეა.