მიწისქვეშა სათბური _ რა არის და რატომ არის მომგებიანი
საქართველოს ბევრ რეგიონში ზამთრის სუსხი მეურნეობისთვის ერთგვარი „დასვენების“ პერიოდია. თუმცა, არსებობს ტექნოლოგია, რომელიც საშუალებას გვაძლევს, ბუნების ძალები ჩვენს სასარგებლოდ გამოვიყენოთ და ბოსტნეული მთელი წლის განმავლობაში ვაწარმოოთ.
პასიური მზის გათბობის პრინციპზე დაფუძნებული მიწისქვეშა სათბური სწორედ ის ეკოლოგიური და ეკონომიური მიგნებაა, რომელიც ფერმერს ზამთარ-ზაფხულ ახალი ბოსტნეულის წარმოების იაფად წარმოების საშუალებას უჩენს.
რა არის და რატომ არის მიწისქვეშა სათბური მომგებიანი?
ტრადიციული სათბურებისგან განსხვავებით, მიწისქვეშა კონსტრუქცია რამდენიმე უპირატესობით გამოირჩევა:
- ენერგოეფექტიანობა: მუდმივი ტემპერატურა და ქარისგან დაცულობა მინიმუმამდე ამცირებს აორთქლებას, რაც წყლის დაზოგვის წინაპირობაა.
- ეკონომიურობა: თქვენ აღარ ხართ დამოკიდებული საწვავსა და ელექტროენერგიაზე, სათბური მზის ენერგიით თბება.
- სტაბილურობა: მრავალწლიანი კვლევების მიხედვით, ნიადაგის თერმული მასა ენერგიის ხარჯებს 60-80%-ით ამცირებს და მცენარეს ზრდისთვის იდეალურ გარემოს უქმნის.
როგორ მუშაობს მიწისქვეშა სათბური?
მუშაობის პრინციპი სამ ბუნებრივ მიგნებაზეა დამოკიდებული:
- მზის რადიაცია: სხივები გამჭვირვალე სახურავიდან აღწევს შიგნით.
- თერმული მასა: ნიადაგი, ქვები ან წყლის კასრები დღისით სითბოს ისრუტავს, ღამით კი გასცემს.
- იზოლაცია: მიწისქვეშა კედლები საიმედოდ ინახავს დაგროვილ ენერგიას და ტენს.
მშენებლობის ძირითადი ეტაპები და პრინციპები
სანამ საქმეს შეუდგებოდეთ, აუცილებელია სათბურის მდებარეობის სწორად შერჩევა. ტერიტორია უნდა იყოს სამხრეთისკენ მიმართული, კარგი დრენაჟითა და ჭარბი მიწისქვეშა წყლებისგან დაცული. მოერიდეთ ისეთ ადგილებს სადაც დიდ ხეები და ჭაობიანი ადგილებია _ ნიადაგში წყალი გროვდება.
ტექნიკური მახასიათებლები:
- სიღრმე უნდა ჰქონდეს 1.8-2.5 მეტრი.
- სახურავი აუცილებლად სამხრეთისკენ უნდა იყოს მომართული.
- ზამთრის მზის (გადახრილი მზის) სხივების ინტენსიობის დასაჭერად სათბური 30°-45°-ით უნდა იყოს დახრილი
სამუშაო პროცესი:
- მოამზადეთ ორმო (საშუალოდ 3-9 მ სიგრძის). ჩრდილოეთის კედელი აამაღლეთ სახურავის დახრილობისთვის.
- ფსკერზე დააფინეთ ხრეში და დაამონტაჟეთ პერფორირებული მილები, რაც დაგიცავთ დატბორვისგან.
- ააგეთ მტკიცე კედლები (ბლოკი, ქვა). შიგნით მოათავსეთ ლოდები ან წყლის კასრები სითბოს აკუმულაციისთვის.
- გამოიყენეთ პოლიკარბონატი. აუცილებლად დატოვეთ სავენტილაციო ღიობები ტენიანობისა და ობის თავიდან ასაცილებლად.
რა მოვიყვანოთ?
ასეთ პირობებში საუკეთესოდ ხარობს: სალათის ფურცლები, ისპანახი, მწვანილი, მარწყვი, ასევე პომიდორი, კიტრი და წიწაკა, ბროკოლი…
გავრცელებული შეცდომები:
- ვენტილაციის უგულებელყოფა;
- სუსტი კედლები, რომლებიც ვერ უძლებენ დაწოლას, წვიმის წყალს და იშლება;
- დრენაჟის არარსებობა.
მიწისქვეშა სათბური არ არის მხოლოდ დროებითი ნაგებობა, ეს არის გრძელვადიანი ინვესტიცია თქვენს მოურნეოაში.
მინიმალური დანახარჯებითა და ბუნებრივი რესურსების გონივრული გამოყენებით, თქვენ შეძლებთ ყოველდღე გქონდეთ ახალი, ორგანული პროდუქტი.
დაიმახსოვრეთ: ბუნება ხშირად უკეთ მუშაობს, ვიდრე თერმოსტი.
გაფრთხილება: სტატია ატარებს საინფორმაციო ხასიათს.
მშენებლობის დაწყებამდე გირჩევთ კონსულტაცია გაიაროთ ინჟინერთან და აგრონომთან თქვენი ნიადაგის სპეციფიკის გათვალისწინებით.