რძის წარმოების გამკაცრებული კონტროლი – სურსათის ეროვნულმა სააგენტომ არარეგისტრირებული საწარმოები გამოავლინა

სურსათის ეროვნული სააგენტო რძისა და რძის გადამმუშავებელი საწარმოების კონტროლს უწყვეტ რეჟიმში ახორციელებს, რათა მომხმარებლისთვის სურსათის უვნებლობა და ხარისხის სტანდარტების დაცვა უზრუნველყოს.

სააგენტოს ინსპექტორები განსაკუთრებით აქტიურად მუშაობენ რეგიონებში, სადაც რძის პროდუქტების მცირე და საშუალო წარმოება ხშირად რეგისტრაციისა და ჰიგიენური ნორმების დაცვის გარეშე ხდება.

ფიზიკური პირი მ.გ., რომელიც ყველს რეალიზაციის მიზნით აწარმოებდა, ეკონომიკურ საქმიანობათა რეესტრში რეგისტრაციისა და სააგენტოს აღიარების გარეშე მოქმედებდა. შედეგად, მეწარმე დაჯარიმდა, საწარმოო პროცესი შეუჩერდა, ხოლო ამოღებული სურსათი დაილუქა და სააგენტოს ზედამხედველობით განადგურდა.

ამას გარდა, სახელმწიფო კონტროლის ფარგლებში ხელმეორედ შეუჩერდა საწარმოო პროცესი სიღნაღის მუნიციპალიტეტის სოფელ ჯუგაანში არსებულ არარეგისტრირებულ რძის გადამმუშავებელ საწარმოს.

ფიზიკური პირი თ.ბ., რომელმაც წარმოების შეჩერების მიუხედავად თვითნებურად განაგრძო ყველის წარმოება, განმეორებითი დარღვევის გამო 5000 ლარით დაჯარიმდა.

სტატისტიკური მონაცემების მიხედვით, 2025 წელს სურსათის ეროვნულმა სააგენტომ რძისა და რძის გადამმუშავებელი წარმოებების კონტროლი მთელი ქვეყნის მასშტაბით გაააქტიურა. მხოლოდ მიმდინარე წელს სააგენტოს ინსპექტორებმა 45 არარეგისტრირებული საწარმო გამოავლინეს. მათგან დაახლოებით 20-მდე მეწარმემ უკვე მიმართა სააგენტოს და საქმიანობა კანონმდებლობის მოთხოვნათა შესაბამისად დაარეგისტრირა.

რძის წარმოებისა და გადამუშავების სფეროში სახელმწიფო კონტროლის გამკაცრება მიზნად ისახავს მოქალაქეების ჯანმრთელობის დაცვასა და სამართლიანი ბაზრის ჩამოყალიბებას. რეგისტრირებული და აღიარებული საწარმოები, რომლებიც სურსათის უვნებლობის ნორმებს იცავენ, არა მხოლოდ მომხმარებლის ნდობას იმსახურებენ, არამედ შიდა და გარე ბაზრებზე კონკურენტუნარიანობის შენარჩუნებასაც უზრუნველყოფენ.

სურსათის ეროვნული სააგენტოს აქტიური ზედამხედველობა კვლავ გაგრძელდება, რაც ხარისხიანი და უსაფრთხო რძის პროდუქციის წარმოებას შეუწყობს ხელს.