საფუარი ბაღში: მითი თუ ზრდის ეფექტიანი სტიმულატორი?
ბევრი ფერმერი საფუარს მხოლოდ სამზარეულოში იყენებს, თუმცა გამოცდილმა მებაღეებმა იციან, რომ ეს მიკროსკოპული სოკოები ნიადაგის ნამდვილი „გამაჯანსაღებლები“ არიან.
საფუარი აჩქარებს ორგანული ნივთიერებების დაშლას და მცენარის ფესვთა სისტემას საოცარ ძალას მატებს.
როგორ მუშაობს საფუარი?
საფუარის სოკოები, ნიადაგში მოხვედრისას, აქტიურად მრავლდებიან და გამოყოფენ ნივთიერებებს, რომლებიც ააქტიურებენ ნიადაგის მიკროფლორას.
- ფესვების სტიმულაცია: კვლევებმა აჩვენა, რომ საფუარის ნაყენით დამუშავების შემდეგ ფესვთა სისტემა 2-10-ჯერ უფრო სწრაფად ვითარდება.
- აზოტისა და ფოსფორის გამოთავისუფლება: საფუარი ეხმარება ნიადაგში არსებულ აზოტსა და ფოსფორს, გადავიდნენ მცენარისთვის ადვილად ასათვისებელ ფორმაში.
- იმუნიტეტი: საფუარი თრგუნავს ზოგიერთ პათოგენურ ბაქტერიას, რაც მცენარეს უფრო გამძლეს ხდის დაავადებების მიმართ.
მომზადების რეცეპტები
საფუარის ნაყენი ყოველთვის უნდა მომზადდეს თბილ წყალში (30-35°C), რათა სოკოები „გააქტიურდნენ“.
ვარიანტი 1: ნედლი (პრესილი) საფუარით:
- 1 კგ. ნედლი საფუარი გახსენით 5 ლიტრ თბილ წყალში;
- დაამატეთ 2-3 სუფრის კოვზი შაქარი (პროცესის დასაჩქარებლად);
- გააჩერეთ 2-3 საათი;
- გამოყენება _ მიღებული კონცენტრატი გახსენით წყალში პროპორციით 1:10 (ყოველ 1 ლიტრ ნაყენზე 10 ლიტრი წყალი).
ვარიანტი 2: მშრალი საფუარით:
- 10 გრამი მშრალი საფუარი (1 პაკეტი) და 2 სუფრის კოვზი შაქარი გახსენით 10 ლიტრ თბილ წყალში;
- გააჩერეთ 2-3 საათი მზისგულზე;
- გამოყენება _ მიღებული ნაზავი გახსენით წყალში პროპორციით 1:5.
აუცილებლად გაითვალისწინეთ!
- საფუარი არ მუშაობს ცივ ნიადაგში. მისი გამოყენება ეფექტიანი მხოლოდ მაშინ, როცა მიწა კარგად არის გამთბარი (მაისის შუა რიცხვებიდან).
- საფუარი დუღილის პროცესში ნიადაგიდან აქტიურად ითვისებს კალიუმსა და კალციუმს, ამიტომ, საფუარით კვებისას აუცილებელია ნიადაგში ხის ნაცრის შეტანაც, რათა ბალანსი არ დაირღვეს.
- საფუარით კვება შეიძლება მაქსიმუმ 2-3-ჯერ სეზონზე.
- ზედმეტი დოზირება ნიადაგს გამოფიტავს.
რისთვის არის საფუარის სასუქი საუკეთესო?
- ჩითილების გადარგვისას _ ეხმარება მცენარეს ახალ ადგილზე სწრაფ ადაპტაციაში.
- პომიდვრისა და კიტრისთვის _ ზრდის მოსავლიანობას და აუმჯობესებს ნაყოფის გემოს.
- ოთახის ყვავილებისთვის _ აცოცხლებს „მოწყენილ“ მცენარეებს.
დასკვნა: საფუარი არის ბუნებრივი, უსაფრთხო და იაფი საშუალება მცენარის პოტენციალის გამოსავლენად. ის მოქმედებს როგორც „აკუპუნქტურა“ ნიადაგისთვის _ აღვიძებს მის შინაგან ძალებს.
საფუარი ტრადიციული გაგებით არ არის სასუქი, ის უფრო „ნიადაგის მზარეულია“, რომელიც მიწაში არსებულ საკვებს მცენარისთვის იოლად მოსანელებელ „კერძად“ აქცევს.
კიდევ ერთხე გავიმეორეგბთ: მისი გამოყენება საუკეთესო შედეგს იძლევა მაშინ, როცა ნიადაგი თბილია და ორგანული ნივთიერებებით (ნაკელით ან კომპოსტით) მდიდარი.
გახსოვდეთ: საფუარი მუშაობს მცენარის სასარგებლოდ მხოლოდ მაშინ, როცა მას ნაცრის სახით კალიუმისა და კალციუმის მარაგსაც მივაწვდით. ეს არის მარტივი, იაფი და ნატურალური გზა ჯანსაღი და უხვი მოსავლისკენ.