ციტრუსის წარმოება მნიშვნელოვან ეკონომიკურ სარგებელს უკავშირდება

ციტრუსი საქართველოში ერთ-ერთ სტრატეგიულ აგროკულტურად რჩება, რომლის წარმოება და რეალიზაცია მნიშვნელოვან ეკონომიკურ სარგებელს უკავშირდება.

განსაკუთრებით მაღალი დატვირთვა ციტრუსის სექტორს აჭარაში აქვს, სადაც მიმდინარე სეზონი უხვი მოსავლითა და ექსპორტის მზარდი მაჩვენებლებით გამოირჩევა.

სახელმწიფოსა და კერძო სექტორის კოორდინირებული მუშაობა მიზნად ისახავს როგორც სტანდარტული, ისე არასტანდარტული პროდუქციის სრულფასოვან დაბინავებასა და ფერმერთა შემოსავლების ზრდას.

გარემოს დაცვისა და სოფლის მეურნეობის მინისტრი დავით სონღულაშვილი, აჭარის ავტონომიური რესპუბლიკის მთავრობის თავმჯდომარე სულხან თამაზაშვილი, აჭარის სოფლის მეურნეობის მინისტრი დენის სალუქვაძე და საქართველოს პარლამენტის წევრები ქობულეთში, ციტრუსის მიმღებ-გადამმუშავებელ საწარმოში  შპს „იბერია ორბი ციტრუსი“ იმყოფებოდნენ, სადაც ადგილზე გაეცნენ საწარმოს ტექნოლოგიურ და საწარმოო პროცესებს.

შპს „იბერია ორბი ციტრუსს“ 24 საათის განმავლობაში 250 ტონა ციტრუსოვანი ნაყოფის მიღების, დახარისხებისა და პარაფინირების შესაძლებლობა აქვს. მიმდინარე სეზონზე კომპანია გეგმავს 4 000 ტონა ციტრუსის მიღება-გადამუშავებას, რომელიც სრულად ექსპორტზე იქნება გატანილი. ამ ეტაპზე საწარმოში 100-მდე ადამიანია დასაქმებული, რაც რეგიონში დასაქმების კუთხითაც მნიშვნელოვანია.

დავით სონღულაშვილის განცხადებით, უკვე ექსპორტირებულია 20 ათას ტონაზე მეტი ციტრუსი, რის შედეგადაც დაახლოებით 12 მილიონი აშშ დოლარის შემოსავალია მიღებული.

მინისტრის თქმით, უხვი მოსავლის პირობებში განსაკუთრებით მნიშვნელოვანია, რომ პროდუქციის სრული მოცულობა დაბინავდეს და არც ერთი კილოგრამი არ დარჩეს გაუყიდავი. ამ პროცესში კოორდინაციას ადგილობრივი ხელისუფლება ახორციელებს.

განსაკუთრებული ყურადღება ეთმობა არასტანდარტული ციტრუსის მიმართულებასაც. „იბერია ორბი ციტრუსი“ იღებს არასტანდარტულ მანდარინს, რომლის გადამუშავების სიმძლავრე 24 საათში 200 ტონამდე ნედლეულს შეადგენს. მიღებული ნედლეულისგან იწარმოება ციტრუსის კონცენტრატი, რომლის ექსპორტზე რეალიზაცია უახლოეს მომავალში იგეგმება. საწარმოს ასევე აქვს 3 000 ტონიანი სამაცივრე მეურნეობა, რაც მოსავლის მართვისა და ხარისხის შენარჩუნების მნიშვნელოვან წინაპირობას ქმნის.

ციტრუსის სექტორის მხარდაჭერის ფარგლებში არასტანდარტული პროდუქციის სუბსიდირებისთვის უკვე გამოყოფილია 4 მილიონი ლარი. მინისტრის შეფასებით, ასეთი პროგრამები ფერმერებისთვის დამატებითი შემოსავლების წყაროა და ამავე დროს ხელს უწყობს დარგის მდგრად განვითარებას.

„ციტრუსი ერთ-ერთია იმ აგროკულტურებს შორის, რომლის წარმოებაც მნიშვნელოვან ეკონომიკურ სარგებელს უკავშირდება. ქართულ ციტრუსზე მოთხოვნა არსებობს როგორც ადგილობრივ, ისე საექსპორტო ბაზრებზე. ეს კი ფერმერებისთვის ხარისხის მუდმივი გაუმჯობესების მნიშვნელოვან მოტივაციას ქმნის“ _ აღნიშნა დავით სონღულაშვილმა.

მიმდინარე ციტრუსის სეზონი აჭარაში ნათლად აჩვენებს, რომ სახელმწიფო მხარდაჭერა, გადამმუშავებელი საწარმოების ეფექტიანი მუშაობა და ექსპორტზე ორიენტირებული პოლიტიკა დარგის განვითარების მყარ საფუძველს ქმნის. ექსპორტის მზარდი მაჩვენებლები, არასტანდარტული პროდუქციის გადამუშავება და სუბსიდირების პროგრამები ფერმერთა ინტერესების დაცვასა და ქართული ციტრუსის საერთაშორისო ბაზრებზე კონკურენტუნარიანობის გაძლიერებას ემსახურება. არსებული ტენდენციები ცხადყოფს, რომ ციტრუსის სექტორი კვლავ რჩება აგროსექტორის ერთ-ერთ მნიშვნელოვან მამოძრავებელ ძალად საქართველოში.