სამი მწყრით დაწყებული ბიზნესი – მერაბ ნანავას მეფრინველეობის ფერმა ნოსირში
პროფესიით იურისტმა მერაბ ნანავამ ფრინველების მოშენება და მის ბიზნესად ქცევა ჯერ კიდევ რუსეთში ცხოვრების დროს დაიწყო. 22 წლის შემდეგ ის საქართველოში დაბრუნდა და საყვარელ საქმეს მშობლიურ სოფელშიც მიჰყო ხელი. მწყრის მოშენება-მოვლა ლიტერატურის დახმარებით ისწავლა. ამბობს, რომ მის ფერმაში ამჟამად 1000-მდე მწყერი ცხოვრობს, აქედან 400 კვერცხმდებელია.
ფერმა, რომელიც 130 კვ/მ-ზეა მოწყობილი, სპეციალური გალიებით, ინკუბატორით, წყლის სისტემით, გამწოვით და სხვა საჭირო ინვენტარით არის აღჭურვილი. მიღწეულით თავად ფერმერი არ არის კმაყოფილი და ამბობს, რომ მეურნეობამ სრულყოფილი ფორმა, რომ მიიღოს ბევრი რამ უნდა გააკეთოს.
,,შიგნით ბევრი რამ არის გასაკეთებელი, ფული რომ მქონდეს სულ სხვანაირი იქნება იქაურობა, ერთ ოთახში საჰაერო შახტა ორია, წესით ექვსი უნდა იყოს. მწყერის სწორად გაზრდაში აუცილებელია ნორმალიზირებული ჰაერი, წყალი, საჭმელი, სისუფთავე და ზამთარში სითბო’’, – გვითხრა მეფრინველემ.
,,მწყერისთვის საჭმელს მე თვითონ ვაკეთებ, ვიღებ წითელ სიმინდს, ხორბალს, ქერქს, საკუთარი წისქვილი მაქვს ვფქვავ და შემდეგ ვამატებ თევზის ფქვილს. აუცილებელია დოზები, რომ საერთო ჯამში გარკვეული რაოდენობის საკვები გააკეთო’’, – ამბობს ფერმერი.
მეწარმე გვიყვება, რომ მწყერის კვერცხის შემადგენლობაში რამდენიმე სახის ვიტამინი შედის და მას სხვადასხვა დაავადებების სამკურნალოდ იყენებენ. მწყრის ქონისგან კი წამლებს აკეთებს, რომელიც რადიკულიტის და სახსრების ტკივილის სამკურნალოდ გამოიყენება.
მერაბ ნანავა თვლის რომ მისთვის ჰობად ქცეული ბიზნეს-საქმიანობას ჯერჯერობით ისეთი მოგება არ მოაქვს, რომ მასზე დახარჯულ შრომას შეესაბამებოდეს, თუმცა იცის, ვინც ეს საქმე კარგად იცის და მწყერებს ამრავლებს პერსპექტიულია.
