ქართული ლოკოკინის პროდუქცია საერთაშორისო ბაზარზე გასასვლელად ახალ გზებს ეძებს

საქართველოში ლოკოკინების გადამუშავების განვითარება და ქართული პროდუქციის საერთაშორისო ბაზრებზე რეალიზაცია უცხოელ პარტნიორებთან თანამშრომლობის ერთ–ერთი მიმართულება ხდება.

ამ საკითხებზე გარემოს დაცვისა და სოფლის მეურნეობის მინისტრმა დავით სონღულაშვილმა ფრანგული კომპანიების წარმომადგენლებთან შეხვედრაზე იმსჯელა.

შეხვედრას ფრანგული კომპანია Escal Seafood-ის აღმასრულებელი დირექტორი ლუის ტურესი და კომპანია Abbe Timeo-ს წარმომადგენლები ესწრებოდნენ. მხარეებმა საქართველოში წარმოების განვითარების, საექსპორტო პოტენციალის გაზრდისა და სამომავლო თანამშრომლობის პერსპექტივები განიხილეს.

დავით სონღულაშვილმა სტუმრებს საქართველოს საინვესტიციო გარემო, ქვეყანაში ეკონომიკური ზრდის ტენდენციები და თავისუფალი ვაჭრობის შეთანხმებებით შექმნილი შესაძლებლობები გააცნო. განსაკუთრებული ყურადღება გამახვილდა სახელმწიფო მხარდამჭერ პროგრამებზე, რომელთა მიზანი ადგილობრივი წარმოების განვითარება და ქართული პროდუქციის კონკურენტუნარიანობის ამაღლებაა.

მინისტრის განცხადებით, საერთაშორისო პარტნიორებთან თანამშრომლობა ხელს უწყობს ქართულ საწარმოებში თანამედროვე ცოდნისა და გამოცდილების დანერგვას, ადგილობრივი მეწარმეების შესაძლებლობების გაფართოებასა და ქართული პროდუქციის საერთაშორისო ბაზრებზე პოზიციონირებას.

აღსანიშნავია, რომ კომპანია Abbe Timeo საქართველოში ლოკოკინების გადამუშავების მიმართულებით საქმიანობს, ხოლო ფრანგულ კომპანია Escal Seafood-თან თანამშრომლობა ქართული წარმოების პროდუქციის საერთაშორისო ბაზრებზე რეალიზაციას უკავშირდება.

ლოკოკინების წარმოება და გადამუშავება საქართველოსთვის შედარებით ახალი, თუმცა საექსპორტო პოტენციალის მქონე აგრარული მიმართულებაა. ამ სექტორის განვითარება მხოლოდ ნედლეულის წარმოებით არ უნდა შემოიფარგლოს. მნიშვნელოვანია გადამუშავების თანამედროვე ტექნოლოგიების დანერგვა, პროდუქციის ხარისხისა და სურსათის უვნებლობის საერთაშორისო მოთხოვნებთან შესაბამისობა და სტაბილური საექსპორტო არხების შექმნა.

უცხოელ პარტნიორებთან თანამშრომლობა ამ პროცესს ხელს შეუწყობს, თუმცა მისი რეალური ეკონომიკური შედეგი ადგილობრივი წარმოების გაფართოებასა და ქართველი მეწარმეებისთვის დამატებითი ღირებულების შექმნაში უნდა გამოიხატოს.