სოფლების აღიარების საერთაშორისო ინიციატივაში მონაწილეობისთვის განაცხადების მიღება გრძელდება
სოფლებს, რომლებიც გამოირჩევიან ბუნებრივი მემკვიდრეობის დაცვით, ტრადიციული სასურსათო კულტურით, აგროტურისტული პოტენციალითა და ინოვაციური მიდგომებით, საერთაშორისო აღიარების მიღების საშუალება ეძლევათ.
გაეროს სურსათისა და სოფლის მეურნეობის ორგანიზაცია (FAO) სოფლების აღიარების ინიციატივის ფარგლებში განაცხადების მიღებას აგრძელებს.
ინიციატივის მიზანია იმ სოფლების გამოვლენა და საერთაშორისო დონეზე წარმოჩენა, რომლებიც სოფლის ცხოვრების მრავალფეროვნებას, ადგილობრივ თვითმყოფადობასა და მდგრადი აგროსასურსათო სისტემების განვითარების საუკეთესო გამოცდილებას წარმოადგენენ.
მონაწილეობის მსურველებს შეუძლიათ სოფლების წარდგენა ოთხი ძირითადი კატეგორიის მიხედვით:
- ბუნებრივი სოფლები – დასახლებები, რომლებიც განსაკუთრებულ ყურადღებას უთმობენ ბუნებრივი მემკვიდრეობისა და ბიომრავალფეროვნების დაცვას, ინარჩუნებენ ადგილობრივ ეკოსისტემებს, ტრადიციულ ცოდნასა და ბუნებასთან ჰარმონიულად თანაარსებობის პრაქტიკას.
- ტრადიციული სასურსათო კულტურა – სოფლები, სადაც დღემდე ინარჩუნებენ და ავითარებენ სურსათის წარმოებასთან, გადამუშავებასთან, შენახვასა და მოხმარებასთან დაკავშირებულ გამორჩეულ ტრადიციებს, კულტურულ მემკვიდრეობასა და ადგილობრივ ცოდნას.
- აგროტურისტული გამოცდილება – სოფლები, რომლებიც სოფლის მეურნეობას, ადგილობრივ სასურსათო წარმოებასა და კულინარიულ მემკვიდრეობას ტურიზმთან, კულტურულ და საგანმანათლებლო საქმიანობასთან წარმატებით აერთიანებენ.
- მეცნიერება, ინოვაცია და ციფრული სოფლები – დასახლებები, რომლებიც სოფლის განვითარებისათვის იყენებენ თანამედროვე სამეცნიერო მიღწევებს, ტექნოლოგიურ და ციფრულ გადაწყვეტილებებს და ამავე დროს ინარჩუნებენ ადგილობრივ იდენტობასა და ტრადიციებს.
სოფლის მდგრადი განვითარების ხელშეწყობა
სოფლების აღიარების ინიციატივა შემუშავებულია FAO MuNe-ის – სურსათისა და სოფლის მეურნეობის მუზეუმისა და ქსელის – ფარგლებში, FAO-ს გენერალური დირექტორის, კუ დონჟუს მხარდაჭერით.
პროგრამა ხაზს უსვამს სოფლების მნიშვნელოვან როლს მდგრადი აგროსასურსათო სისტემების ჩამოყალიბებაში, ბიომრავალფეროვნების შენარჩუნებაში, ადგილობრივი ტრადიციებისა და ცოდნის დაცვასა და სოფლის ინკლუზიურ განვითარებაში.
ინიციატივის ერთ-ერთი მთავარი ამოცანაა წარმატებული სოფლების გამოცდილების საერთაშორისო დონეზე გაზიარება და მათი ცნობადობის ამაღლება.
როგორ უნდა მიიღოთ მონაწილეობა?
განაცხადის წარდგენა შესაძლებელია FAO-ს ოფიციალურ ვებგვერდზე: სოფლების აღიარების ინიციატივა – რეგისტრაცია
საქართველოს სოფლებისთვის ეს ინიციატივა მნიშვნელოვანი შესაძლებლობაა, საერთაშორისო საზოგადოებას გააცნონ საკუთარი ბუნებრივი სიმდიდრე, უნიკალური სასურსათო ტრადიციები, სოფლის მეურნეობის გამოცდილება და განვითარების თანამედროვე მიდგომები.
საერთაშორისო აღიარება კი ხელს შეუწყობს ქართული სოფლების ცნობადობის გაზრდასა და მათი პოტენციალის უკეთ წარმოჩენას.