ოზურგეთში 4 კილომეტრამდე სიგრძის სადრენაჟე არხებზე გაწმენდითი სამუშაოები მიმდინარეობს
შპს „საქართველოს მელიორაცია“ ოზურგეთის მუნიციპალიტეტში, მერეკგძელა-კაპროვანის დამშრობ მასივზე სარემონტო-საექსპლუატაციო ღონისძიებებს ატარებს.
სოფელ ნატანებში მაგისტრალური და შემკრები არხების, ჯამში, 4 კილომეტრამდე მონაკვეთის გაწმენდითი სამუშაოები მიმდინარეობს.
ჩატარებული სამუშაოები კოლექტორებში წყლის შეუფერხებლად გადინებას უზრუნველყოფს, რის შედეგადაც 30 ჰექტარ სასოფლო-სამეურნეო დანიშნულების მიწის ფართობზე წყალსაწრეტი მომსახურება გაუმჯობესდება. აღნიშნული ხელს შეუწყობს ადგილობრივად სასოფლო-სამეურნეო პროდუქციის მოსავლიანობის ზრდასა და მიწის რესურსების ეფექტიან გამოყენებას.
„საქართველოს მელიორაცია“ სისტემატურად ახორციელებს სარეაბილიტაციო სამუშაოებს ქვეყნის მასშტაბით, რაც მიზნად ისახავს როგორც სარწყავი, ასევე, წყალსაწრეტი ინფრასტრუქტურის გამართულ ფუნქციონირებას და სოფლის მეურნეობის მდგრად განვითარებას.