რთველი კახეთში დედოფლისწყაროდან დაიწყო

კახეთში რთველი ტრადიციულად დედოფლისწყაროს მუნიციპალიტეტიდან დაიწყო. მოსავლის აღება რეგიონში ყურძნის სიმწიფისა და შესაბამისი კონდიციის მიხედვით ეტაპობრივად მიმდინარეობს. ამ დროისთვის კახეთში დაახლოებით 2,7 ათასი ტონა ყურძენია გადამუშავებული.

რთველის საკოორდინაციო შტაბში ამ ეტაპზე 230 ღვინის კომპანიაა რეგისტრირებული, ხოლო 2026 წლის კახეთის მოსავლის საპროგნოზო მაჩვენებელი დაახლოებით 320 ათასი ტონის ფარგლებშია.

რთველის ორგანიზებულად ჩატარებისა და ყურძნის მოსავლის სრულად რეალიზაციის მიზნით, საქართველოს მთავრობის გადაწყვეტილებით, ჭარბი მოსავლის შემთხვევაში, მევენახეებს ყურძნის ჩაბარების დამატებითი შესაძლებლობა ექნებათ. ამ მიზნით, შპს „მოსავლის მართვის კომპანია“ კახეთში მოწეულ ყურძენს ფიზიკური პირებისგან დადგენილი პირობების შესაბამისად ჩაიბარებს.

ყურძნის ჩაბარებისას მნიშვნელოვანი კრიტერიუმი მისი ხარისხობრივი მდგომარეობა და შაქრიანობაა. კონდიციური და დაუზიანებელი საფერავის, რომლის შაქრიანობა არანაკლებ 21%-ია, ფასი 1,50 ლარით განისაზღვრება. 17%-დან 21%-მდე შაქრიანობის ან ნაწილობრივ დაზიანებული საფერავის შემთხვევაში ფასი 0,90 ლარი, ხოლო 17%-ზე ნაკლები შაქრიანობის ან დაზიანებული ყურძნის შემთხვევაში – 0,30 ლარი იქნება.

„ვაზისა და ღვინის შესახებ“ საქართველოს კანონით ნებადართული სხვა ვაზის ჯიშებისგან მოწეული ყურძნისთვის, თუ ის დაუზიანებელია და შაქრიანობა არანაკლებ 20%-ია, ფასი 1,30 ლარს შეადგენს. 17%-დან 20%-მდე შაქრიანობის შემთხვევაში ფასი 0,80 ლარი, ხოლო 17%-ზე ნაკლები შაქრიანობისას – 0,30 ლარი იქნება.

ყურძნის ჩაბარებისა და გადამუშავების პროცესს რთველის საკოორდინაციო შტაბი უწევს კოორდინაციას. მევენახეებს რთველთან დაკავშირებული ინფორმაციის მიღება შეუძლიათ ცხელ ხაზებზე: 1501 და 032 219 37 18.

2026 წლის რთველის ორგანიზებაში ერთ-ერთი მთავარი საკითხი მოსავლის დროული და სრულად რეალიზაციაა. განსაკუთრებით მნიშვნელოვანი ხდება ყურძნის ხარისხი – სიმწიფე, შაქრიანობა და დაუზიანებელი მდგომარეობა პირდაპირ აისახება მის საბაზრო ღირებულებაზე. შესაბამისად, მევენახისთვის მოსავლის სწორ დროს აღება და ხარისხის შენარჩუნება წელსაც მნიშვნელოვანი ეკონომიკური ფაქტორი იქნება. 320 ათას ტონამდე მოსალოდნელი მოსავლის ფონზე კი ყურძნის შეუფერხებელი ჩაბარებისა და გადამუშავების პროცესის ეფექტიანი ორგანიზება კახეთის მევენახეობა-მეღვინეობის სექტორისთვის განსაკუთრებულ მნიშვნელობას იძენს.