„საქართველოს მელიორაციამ“ სოფელ რუისის სატუმბი სადგური კაპიტალურად შეაკეთა

გარემოს დაცვის და სოფლის მეურნეობის მინისტრი ლევან დავითაშვილი რეაბილიტირებული სატუმბი სადგურის მონახულების შემდეგ ადგილობრივ ფერმერებსაც შეხვდა. როგორც ფერმერებმა აღნიშნეს, ამ სარწყავი სისტემის ამოქმედება მათთვის სასიცოცხლოდ მნიშვნელოვანია.

30 წლიანი პრობლემა გადაწყდა და ის ტერიტორიები, რომელთა მორწყვაც ათეულობით წელი ძალიან გართულებული იყო, დღეს უკვე წყლით უზრუნველყოფილია.

„უმნიშვნელოვანესი პროექტი განვახორციელეთ სოფელ რუისში _ აღნიშნა ლევან დავითაშვილმა_ სადაც ყველაზე დიდი პრობლემა იყო სარწყავი წყლის მიწოდების საკითხი. ივლის-აგვისტოში, როდესაც სარწყავი წყლის ყველაზე მეტი საჭიროებაა, ორ მნიშვნელოვან მაგისტრალში, როგორიც არის ზედა რუს და ტაშისკარის არხი, წყლის მიწოდების დეფიციტი გვქონდა. ამ ორი არხის შემავსებელი სატუმბი სადგური, ფაქტობრივად, თავიდან აშენდა.

პროექტის ჯამური ღირებულება 2 მილიონამდე ლარია. რეაბილიტირებული სადგურით ათას ჰექტარზე მეტი ფართობი გასარწყავიანდება. ეს არის მხარე, სადაც სოფლის მეურნეობის პროდუქციის წარმოების ტრადიციები ყოველთვის იყო. საუბარია მაღალი ღირებულების ბოსტნეულ კულტურებზე, მეხილეობაზე; აქ მცხოვრები ფერმერებისთვის, მშრომელი მოსახლეობისთვის სარწყავი სისტემის ამოქმედება იყო ძალიან მნიშვნელოვანი საკითხი; სამინისტრომ ამ პრობლემის მოგვარება საბიუჯეტო სახსრებით შეძლო; თუმცა, უფრო კომპლექსურად, ჩვენ ქარელის რეგიონში, ზედა რუს არხის სრულ რეაბილიტაციას ვახორციელებთ მსოფლიო ბანკის დახმარებით.

კომპანია, რომელთანაც ხელშეკრულება გაფორმებულია, დაახლოებით, 21 მილიონი ღირებულების სამუშაოებს განახორციელებს, რაც ქარელის მუნიციპალიტეტის სოფლებში სარწყავი წყლის პრობლემას დიდწილად მოაგვარებს.

სოფლის მეურნეობის განვითარების ერთ-ერთი უმნიშვნელოვანესი მიმართულება ინფრასტრუქტურის აღდგენა-რეაბილიტაცია, მათ შორის, რა თქმა უნდა, საირიგაციო ინფრასტრუქტურაც იგულისხმება, რასაც გეგმიურად, თანმიმდევრულად ვახორციელებთ“, – განაცხადა გარემოს დაცვისა და სოფლის მეურნეობის მინისტრმა.

რუისის სატუმბი სადგური კაპიტალურად შეაკეთდა, აღდგა სადაწნეო მილსადენი და დამონტაჟდა ახალი ტუმბო-აგრეგატები, რაც ტაშისკარისა და ზედა რუს მაგისტრალურ არხებში წყლის უწყვეტ მიწოდებას უზრუნველყოფს. შედეგად, სოფლების რუისისა და ურბნისის 1 000 ჰექტარამდე სასოფლო-სამეურნეო მიწის ფართობი სტაბილურად მოირწყვება და 2000-ზე მეტი ბენეფიციარის სარწყავი წყლით დაკმაყოფილება მოხდება.

სარეაბილიტაციო სამუშაოები შპს „საქართველოს მელიორაციამ” გასული წლის ზაფხულში დაიწყო. სატუმბი სადგურის რეაბილიტაციისთვის, სახელმწიფო ბიუჯეტიდან 1 960 395 ლარი დაიხარჯა.