ტოქსიკური კორუფცია: როდესაც „ბიზნესი“ ჯარისკაცების სიცოცხლეზე ნადირობს
სკანდალი თავდაცვისა და შინაგან საქმეთა სამინისტროების მომარაგებაში _ საგამოძიებო სამსახურმა 24 ტონაზე მეტი ფალსიფიცირებული და სიცოცხლისთვის საშიში თევზის კონსერვი ამოიღო.
ექსპერტიზა შოკირებულია – პროდუქცია იმდენად მომწამვლელია, რომ მისი შემოწმება ლაბორატორიულ პირობებშიც კი საფრთხეს წარმოადგენდა.
სახელმწიფო უსაფრთხოება მხოლოდ ტყვია-წამალი და შეიარაღება არ არის; ეს, პირველ რიგში, იმ ადამიანების ჯანმრთელობაა, რომლებიც ქვეყნის სადარაჯოზე დგანან. თუმცა, როგორც ირკვევა, ზოგიერთი ბიზნესსუბიექტისთვის სახელმწიფო ტენდერი არა პასუხისმგებლობა, არამედ მომაკვდინებელი პროდუქციით გამდიდრების შანსია. საქართველოს ფინანსთა სამინისტროს საგამოძიებო სამსახურმა შპს „ბატონოს“ ხელმძღვანელი დააკავა, რომლის საქმიანობაც კრიმინალურ დრამას უფრო ჰგავს, ვიდრე სამეწარმეო საქმიანობას.
გამოძიებით დადგინდა, რომ 2025 წელს, ბრალდებულმა სახელმწიფო ტენდერის ფარგლებში გაფორმებული ხელშეკრულებით, სასაზღვრო პოლიციასა და შპს „სახელმწიფო კვებით უზრუნველყოფას“ 380 792 ლარის ღირებულების თევზის კონსერვი მიაწოდა. საუბარია 24 177 კილოგრამზე მეტ პროდუქციაზე, რომელიც განკუთვნილი იყო შინაგან საქმეთა და თავდაცვის სამინისტროების პირადი შემადგენლობისთვის.
საგამოძიებო მოქმედებებისას, საწარმოს ჩხრეკის შედეგად ამოღებულია დამატებით 17 241 ერთეული ფალსიფიცირებული კონსერვი. თუმცა, ყველაზე საგანგაშო არა ციფრები, არამედ ის პირობებია, სადაც ეს პროდუქცია მზადდებოდა: ნედლეულის შენახვისა და დამუშავების წესები კრიტიკულად არღვევდა სურსათის უსაფრთხოების ყოველგვარ ნორმას.
ექსპერტიზა სიცოცხლის რისკის ფასად
ამ საქმეში ყველაზე შემზარავი დეტალი ქიმიური და მიკრობიოლოგიური ექსპერტიზის დასკვნაა. პროდუქცია არა მხოლოდ არ შეესაბამებოდა ეტიკეტზე მითითებულ ენერგეტიკულ ღირებულებასა თუ თევზის ხორცის მასურ წილს, არამედ პირდაპირ საფრთხეს წარმოადგენდა მომხმარებლისთვის.
„რიგ შემთხვევებში ექსპერტიზის ჩატარება ვერ მოხერხდა, რადგან პროდუქცია მაღალი ტოქსიკურობის გამო საფრთხეს უქმნიდა თავად ექსპერტის სიცოცხლესა და ჯანმრთელობას.“ – ნათქვამია საგამოძიებო სამსახურის განცხადებაში.
ეს ნიშნავს, რომ ქართველი ჯარისკაცებისა და პოლიციელების თეფშებზე შესაძლოა აღმოჩენილიყო ნივთიერება, რომელთან მიკარებასაც კი სპეციალისტები ერიდებოდნენ.
განაჩენი და პასუხისმგებლობა
ამ ეტაპზე გამოძიება საქართველოს სისხლის სამართლის კოდექსის 197-ე მუხლის მე-3 ნაწილით მიმდინარეობს. ბრალდებულს 5-დან 7 წლამდე ვადით თავისუფლების აღკვეთა ემუქრება. თუმცა, ეს შემთხვევა ბევრად უფრო ღრმა სისტემურ კითხვებს აჩენს: როგორ ახერხებს მსგავსი „მომაკვდინებელი საწარმო“ სახელმწიფო ტენდერებში გამარჯვებას და სად გადის ზღვარი ბიზნეს-ინტერესსა და ქვეყნის ღალატს შორის?
ფინანსთა სამინისტროს საგამოძიებო სამსახური აგრძელებს მუშაობას ბაზარზე მსგავსი საფრთხის შემცველი პროდუქციის გამოსავლენად. საზოგადოება კი მკაცრ რეაგირებას ელოდება – რადგან როდესაც საქმე ადამიანის სიცოცხლეს ეხება, კომპრომისი არ არსებობს.