საქართველო-საფრანგეთის აგროპარტნიორობა — მეღვინეობასა და მეცხოველეობაში თანამშრომლობა ღრმავდება

გარემოს დაცვისა და სოფლის მეურნეობის მინისტრი დავით სონღულაშვილი საფრანგეთის მეღვინეობისა და მეცხოველეობის სფეროს წამყვანი კომპანიების წარმომადგენლებს შეხვდა. შეხვედრის დროს განხილეს ორი ქვეყნის სტრატეგიული პარტნიორობის გაღრმავების შესაძლებლობები სოფლის მეურნეობის მიმართულებით. განსაკუთრებული ყურადღება გამახვილდა მეღვინეობისა და მესაქონლეობის დარგებში გამოცდილების გაზიარებასა და ერთობლივი პროექტების განვითარებაზე.

მინისტრის თქმით, ქართული ღვინო თავისი უნიკალური გემოვნური თვისებებით საერთაშორისო ბაზრებზე დიდ ყურადღებას იმსახურებს, ხოლო ფრანგი მეღვინეების დაინტერესება ქართული პროდუქციით დამატებითი სტიმულია ადგილობრივი მეწარმეებისთვის. სონღულაშვილის განცხადებით, შეხვედრას ესწრებოდნენ ევროპის ერთ-ერთი უმსხვილესი მეცხოველეობის გამოფენის ორგანიზატორები, რომელთაც საქართველოს მესაქონლეობის სექტორის მიმართ დაინტერესება გამოხატეს.

თანამშრომლობის ფარგლებში დაგეგმილია ინვესტიციების მოზიდვა, განათლებისა და კადრების გადამზადება, ასევე თანამედროვე ტექნოლოგიების დანერგვა. აღნიშნულს მიზნად აქვს ქართული აგრარული სექტორის მოდერნიზაცია და ევროპის ბაზრებთან ინტეგრაცია.

მეღვინეობის მიმართულებით შეხვედრას დაესწრნენ საფრანგეთის ღვინის მწარმოებელი და დისტრიბუტორი კომპანიის, Desprat Saint Verny-ს აღმასრულებელი დირექტორი პიერ დესპრა და კომპანიის წარმომადგენლები. დესპრას განცხადებით, მისი ვიზიტი საქართველოში სამი მიზანს ემსახურება – ქვევრის ღვინის ტექნოლოგიის გაცნობას, ქართული ღვინის პოპულარიზაციას საფრანგეთში და პირადი წვლილის შეტანას ქართულ მეღვინეობაში.

მეცხოველეობის მიმართულებით, შეხვედრას ესწრებოდნენ ევროპაში ერთ-ერთი ყველაზე მასშტაბური გამოფენის – მეცხოველეობის სამიტის პრეზიდენტი ჟაკ შაზალე და ფრანგული კომპანია Race Salers Viande-ს გენერალური დირექტორი ბრუნო დუფაიეტი. შეხვედრაზე განხილული იყო ქართველ ფერმერებთან პირდაპირი ურთიერთობის განვითარების პერსპექტივები.

ვიზიტის ფარგლებში, დელეგაციის წევრებმა ღვინის ეროვნული სააგენტოს მუზეუმი მოინახულეს და ქვევრში დაყენებული იშვიათი ქართული ღვინოები დააგემოვნეს.

შეხვედრას ასევე ესწრებოდნენ გარემოს დაცვისა და სოფლის მეურნეობის მინისტრის მოადგილე ლაშა დოლიძე, ღვინის ეროვნული სააგენტოს თავმჯდომარე ლევან მეხუზლა და სამეცნიერო-კვლევითი ცენტრის დირექტორი ლევან უჯმაჯურიძე.