„დანერგე მომავალი“: სახელმწიფო თანადაფინანსება მრავალწლოვანი ბაღებისთვის – განცხადების მიღება 28 თებერვლის ჩათვლით გრძელდება
მრავალწლოვანი კულტურების გაშენება გრძელვადიანი და სტრატეგიული ინვესტიციაა. ფერმერებისთვის ფინანსური ტვირთის შესამსუბუქებლად და თანამედროვე სტანდარტების ბაღების მოსაწყობად, სოფლის განვითარების სააგენტო აგრძელებს პროგრამის „დანერგე მომავალი“ აქტიურ ფაზას. გაეცანით პროგრამის პირობებსა და ვადებს…
მრავალწლოვანი ბაღების გაშენებით დაინტერესებულ ფერმერებს პროგრამაში „დანერგე მომავალი“ მონაწილეობისთვის განაცხადების წარდგენა სოფლის განვითარების სააგენტოში მიმდინარე წლის 28 თებერვლის ჩათვლით შეუძლიათ.
პროგრამის „დანერგე მომავალი“ ბაღების კომპონენტის ფარგლებში ფინანსდება შესაძენი ნერგების ღირებულების არაუმეტეს 70%, ხოლო სასოფლო-სამეურნეო სტატუსის მქონე კოოპერატივებისათვის, გამყოფი ხაზის მიმდებარე სოფლებისა და მაღალმთიანი დასახლებების შემთხვევაში – არაუმეტეს 80%.
რაც შეეხება წვეთოვანი სარწყავი სისტემას, პროგრამის პირობების შესაბამისად, ნახევარ ჰექტარზე თანადაფინანსება შეადგენს ღირებულების 50%-ს, მაგრამ არაუმეტეს 1,250 ლარს. სასოფლო-სამეურნეო სტატუსის კოოპერატივებისათვის, გამყოფი ხაზის მიმდებარე სოფლებისა და მაღალმთიანი დასახლებების შემთხვევაში თანადაფინანსების ოდენობა განსაზღვრულია არაუმეტეს 60%-ით, არაუმეტეს 1500 ლარით.
პროგრამაში მონაწილეობა ერთ პირს რამდენჯერმე შეუძლია, მაგრამ მიღებული დაფინანსება, ჯამში, არ უნდა აღემატებოდეს 500,000 ლარს, ლურჯი მოცვის შემთხვევაში – 750,000 ლარს.
პროგრამის ფარგლებში შესაძლებელია დაფინანსდეს მრავალწლიანი კულტურების ბაღის გაშენება მინიმუმ 0.5 ჰექტარზე და მაქსიმუმ 50 ჰექტარზე.
პროგრამაში მონაწილეობა შეუძლია საქართველოს მოქალაქე ფიზიკურ ან საქართველოში საქართველოს კანონმდებლობით დადგენილი წესით რეგისტრირებულ მეწარმე ფიზიკურ ან/და იურიდიული პირს (მათ შორის, სასოფლო-სამეურნეო კოოპერატივი), რომელშიც სახელმწიფო არ ფლობს წილს/პაის/აქციას, გარდა იმ იურიდიული პირისა, რომელშიც სს „საპარტნიორო ფონდი“ პირდაპირ ან არპირდაპირ ფლობს წილს, პაის, აქციებს.
პროგრამაში განაცხადების მიღება 2025 წლის 10 ნოემბერს დაიწყო, 2026 წლის 26 იანვრის მდგომარეობით მიღებულია 206 განაცხადი, მათ შორის თანადაფინანსების ხელშეკრულება გაუფორმდა 128 ბენეფიციარს.
პროგრამაში განაცხადების მიიღება ელექტრონულად, სოფლის განვითარების სააგენტოს ოფიციალურ ვებგვერდზე www.rda.gov.ge.
როგორც სტატისტიკა აჩვენებს, პროგრამით დაინტერესება დიდია და ბენეფიციართა რიცხვი ყოველდღიურად იზრდება. თუ გსურთ მიიღოთ სახელმწიფოს მხარდაჭერა და განავითაროთ თქვენი მეურნეობა, არ გამოტოვოთ 28 თებერვალი. ეს არის რეალური შანსი, დანერგოთ თანამედროვე ტექნოლოგიები და მიიღოთ ევროპული სტანდარტის მოსავალი.