ნიადაგის დატკეპნის შემცირების ეფექტიანი მეთოდი

თანამედროვე სოფლის მეურნეობაში მძიმე ტრაქტორებისა და სხვა სასოფლო-სამეურნეო ტექნიკის ხშირი მოძრაობა ნიადაგის დატკეპნის ერთ-ერთი მთავარი მიზეზია.

დატკეპნილი ნიადაგი ცუდად ატარებს წყალსა და ჰაერს, აფერხებს ფესვების განვითარებას და ამცირებს მოსავლიანობას.

ამ პრობლემის შესამცირებლად მსოფლიოში სულ უფრო ფართოდ გამოიყენება მუდმივი ტექნოლოგიური კვლების სისტემა (Controlled Traffic Farming – CTF).

როგორ მუშაობს სისტემა?

მეთოდის მთავარი პრინციპია, რომ ტრაქტორები, კომბაინები, სათესი და შესაწამლი ტექნიკა მინდორში ყოველთვის ერთსა და იმავე, წინასწარ განსაზღვრულ კვალზე მოძრაობდნენ. ამისთვის ყველა მანქანის თვლების განლაგება და სამუშაო განი ერთმანეთთან უნდა იყოს შეთანხმებული. GPS-ნავიგაცია კი ტექნიკას ზუსტად განსაზღვრულ მარშრუტზე გადაადგილებაში ეხმარება.

შედეგად, ნიადაგის მხოლოდ გარკვეული ნაწილი ექცევა ტექნიკის ბორბლების ქვეშ, დანარჩენი ფართობი კი დატკეპნისგან დაცულია.

რა სარგებელი აქვს ფერმერს?

• მცირდება ნიადაგის დატკეპნა და უმჯობესდება მისი სტრუქტურა;
• ნიადაგში უკეთ აღწევს წყალი და ჰაერი;
• ფესვები უფრო თავისუფლად ვითარდება;
• მცირდება ეროზიისა და ტენის დაკარგვის რისკი;
• იზოგება საწვავი, სამუშაო დრო და შრომითი დანახარჯები;
• შესაძლებელია მოსავლიანობის გაუმჯობესება.

კვლევების მიხედვით, მუდმივი ტექნოლოგიური კვლების გამოყენებით ტექნიკის ბორბლების კვალი ზოგ შემთხვევაში მინდვრის ფართობის მხოლოდ 10-15%-ს იკავებს. ჩვეულებრივი მოძრაობისას კი დატკეპნილი შეიძლება იყოს ფართობის 80%-ზე მეტი.

რა არის გასათვალისწინებელი?

სისტემის დასანერგად საჭიროა ტექნიკის სამუშაო სიგანისა და თვლების განლაგების შეთანხმება, შესაბამისი ტექნოლოგიური დაგეგმვა და, სასურველია, GPS-ნავიგაცია. განსაკუთრებით მნიშვნელოვანია ნიადაგის მდგომარეობის გათვალისწინება და მძიმე ტექნიკით სველ მიწაზე გადაადგილების შეზღუდვა.

მუდმივი ტექნოლოგიური კვლები ნიადაგის დაცვისა და რესურსების ეკონომიურად გამოყენების პრაქტიკული გზაა. მისი მთავარი უპირატესობა ისაა, რომ ფერმერი ტექნიკას კი არ ცვლის აუცილებლად, არამედ ცვლის მინდორში მისი გადაადგილების წესს. ეს ხელს უწყობს ნიადაგის ნაყოფიერების შენარჩუნებას და მეურნეობის ხარჯების შემცირებას.

  მოამზადა შოთა მაჭარაშვილმა