როგორ ვებრძოლოთ ამიერკავკასიის პურის ბზუალას?

 პურის ბზუალა ძირითადად აღმოსავლეთ საქართველოშია გავრცელებული.

მავნებელს ერთწლიანი გენერაცია ახასიათებს. ძირითადად იზამთრებს ნიადაგში 15-20 სმ სიღრმეზე. გაზაფხულზე 12℃ ტემპერატურის პირობებში ისინი გამოიზამთრებენ, აკეთებენ სოროებს და იწყებენ ჯეჯილის დაზიანებას. მატლები ძირითადად ღამით იკვებებიან, დღისით იმალებიან სოროებში.

გამოზამთრების შემდეგ 1,5-2 თვის განმავლობაში მატლები აქტიურად იკვებებიან. ჭუპრდებიან მაისში, ივნისის დასაწყისში. მატლი იჭუპრებს 15-20 სმ ხვრელში, ჭუპრის ფაზა 2-3 კვირა გრძელდება. ხოჭო ღამის მწერია, დღე იმალება ნიადაგის ნაპრალებში. მაღალი სიცხეების (30℃) პირობებში ხოჭო დიაპაუზაში გადადის. შემოდგომაზე სიცხის დაწევის შემდეგ, ხოჭოები გამოდიან, იკვებებიან ჩამოცვენილი მარცვლებით და იწყებენ კოპულაციას. კვერცხდება გრძელდება ოქტომბრის ბოლომდე, მდედრი ხჭო დებს 10-40 კვერცხს ჯგუფურად. კვერცხის ფაზა 8-10 დღე გრძელდება.

პურის ბზუალას მასობრივი გამრავლების ძირითადი მიზეზია ერთი და იმავე ნაკვეთზე პურეული კულტურების თესვა და სარეველები, რადგან მავნებლის დამატებით საკვებს სწორედ სარეველა ბალახი (ჭანგა და სხვა) წარმოადგენს.

ბრძოლის ღონისძიებები: სწორი თესლბრუნვა, იმის გათვალისწინებით, რომ წინამორბედი იყოს ისეთი კულტურა, რომელიც არ ზიანდება პურის ბზუალათი ( მზესუმზირა, ჭარხალი, საკვები ბალახები და სხვა). დასათესად შეწამლული თესლის გამოყენება. გაზაფხულზე გრანულირებული ინსექტიციდების ან პრეპარატ მარშალის შეტანა ნიადაგში.