აზერბაიჯანში ღვინის ტურიზმის განვითარების ახალი ეტაპი იწყება

აზერბაიჯანში ღვინის ტურიზმის (ენოტურიზმის) განვითარების მიმართულებით მნიშვნელოვანი შეხვედრა გაიმართა, რომელშიც საერთაშორისო მოძრაობა Slow Wine-ის წამყვანი ექსპერტები, ადგილობრივი მეღვინეები და მეღვინეობის სფეროს წარმომადგენლები მონაწილეობდნენ.

ღონისძიება მიზნად ისახავდა თემზე დაფუძნებული მეღვინეობის ტრადიციების განვითარებასა და ადგილობრივი გამოცდილების საერთაშორისო დონეზე გატანას.

შეხვედრაზე განიხილეს აზერბაიჯანული მევენახეობა-მეღვინეობის პოპულარიზაციისთვის, გამჭვირვალე და მდგრადი წარმოების პრაქტიკების დანერგვის და საზოგადოების უფრო მასობრივად ჩართვის  გააქტიურების გზები.

იტალიელი ექსპერტების დელეგაცია საგანგებოდ ეწვია აზერბაიჯანის ღვინის რეგიონებს — ისმაილს, გაბალას, აღსუსასა და შამახს, სადაც ადგილზე გაეცნენ ადგილობრივ ბუნებრივ პირობებსა და ტრადიციულ მეთოდებზე დაფუძნებულ ღვინის წარმოებას.

Slow Wine, როგორც მოძრაობა Slow Food-ის ნაწილი, ხელს უწყობს ბიომრავალფეროვნებისა და კულტურული მემკვიდრეობის შენარჩუნებას, აგროეკოლოგიური მიდგომების განვითარებასა და რეგიონის უნიკალური ყურძნის ჯიშებზე დაფუძნებული წარმოების მხარდაჭერას.

აზერბაიჯანის სახელმწიფო ტურიზმის სააგენტო ღვინის ტურიზმის ინტეგრაციას საერთაშორისო ბაზარზე სტრატეგიულ მიმართულებად განიხილავს. განსაკუთრებული ყურადღება ეთმობა ქვეყნის დასავლეთ, ჩრდილოეთ და ჩრდილო-დასავლეთ რეგიონებში არსებულ მარშრუტებზე უძველესი მეღვინეობის ტრადიციების შენარჩუნებასა და მათი ტურისტული პოტენციალის სრულად ათვისებას.