ატმოსფერული ჰაერი და ჯანმრთელობა – საგანმანათლებლო შეხვედრები სკოლებში
ატმოსფერული ჰაერის ხარისხი თანამედროვე გარემოსდაცვითი პოლიტიკის ერთ-ერთ უმნიშვნელოვანეს მიმართულებად რჩება. სწორედ ამ საკითხზე გარემოს დაცვისა და სოფლის მეურნეობის სამინისტროს სსიპ გარემოსდაცვითი ინფორმაციისა და განათლების ცენტრის ინიციატივითა და ორგანიზებით, საჯარო სკოლებში საინფორმაციო-შემეცნებითი შეხვედრები გაიმართა.
შეხვედრების მიზანი იყო მოსწავლეებში ატმოსფერული ჰაერის ხარისხის მნიშვნელობის შესახებ ცნობიერების ამაღლება, ჰაერის დაბინძურების ძირითადი წყაროების გაცნობა და მისი შემცირებისკენ მიმართული პრაქტიკული მიდგომების წარმოჩენა.
ღონისძიებების ფარგლებში განიხილეს ჰაერის დაბინძურების გავლენა ადამიანის ჯანმრთელობასა და გარემოზე, არსებული გამოწვევები, ჰაერის ხარისხის გაუმჯობესების მიზნით განხორციელებული და დაგეგმილი ღონისძიებები, აგრეთვე ყოველდღიურ ცხოვრებაში ცვლილებების როლი ატმოსფერული ჰაერის დაბინძურების შემცირების პროცესში.
საინფორმაციო-შემეცნებითი შეხვედრები მოიცავდა პრეზენტაციებს, დისკუსიებსა და ინტერაქტიულ აქტივობებს, რაც მოსწავლეთა აქტიურ ჩართულობას და საკითხის მიმართ ინტერესის ზრდას უწყობდა ხელს.
ატმოსფერული ჰაერის ხარისხის მართვის 2023-2025 წლების გეგმა ეფუძნება ქვეყნის ტერიტორიის ზონებად დაყოფას, რაც ჰაერის ხარისხის მართვის ღონისძიებების რეგიონულ თავისებურებებსა და სპეციფიკურ საჭიროებებს ითვალისწინებს. ზონები ერთმანეთისგან განსხვავდება ურბანული განვითარების დონით, სატრანსპორტო დატვირთვითა და ინდუსტრიული აქტივობის ინტენსივობით.
ამ ეტაპზე განსაკუთრებული ყურადღება ეთმობა ცენტრალურ ზონას, რომელიც მოიცავს რუსთავისა და ბოლნისის მუნიციპალიტეტებს, სადაც ჰაერის დაბინძურების მაჩვენებლები დამატებით რეაგირებას საჭიროებს.
სკოლებში გამართული საინფორმაციო-შემეცნებითი შეხვედრები მნიშვნელოვანი ნაბიჯია გარემოსდაცვითი განათლების გაძლიერებისკენ.
ახალგაზრდებში ჰაერის ხარისხის საკითხებზე ინფორმირებულობის ზრდა ხელს უწყობს პასუხისმგებლიანი ქცევის ჩამოყალიბებას და გრძელვადიან პერსპექტივაში გარემოსდაცვითი გამოწვევების შემცირებას.
მსგავსი ინიციატივები საფუძველს უყრის ეკოლოგიურად შეგნებული თაობის აღზრდას.