მექსიკაში კაქტუსისგან ბიოსასუქის წარმოება დაიწყეს

შარშან მექსიკის კანონმდებლობაში გაჩნდა პუნქტი ბიოსასუქების წარმოების და პოპულარიზაციის სახელმწიფო მხარდაჭერის შესახებ.

ერთ-ერთი პირველი პროდუქტი, რომელიც ამ ინიციატივით ფართო მხარდაჭერას მოიპოვებს,  „კაქტუსის საკვები დანამატი“ გახდება.

მექსიკის იდალგოს შტატის უნივერსიტეტის (UAEH) მკვლევრებმა შეიმუშავეს ბიოლოგიური სასუქი, რომელიც საკვებად ვარგისი კაქტუსის, ნოპალის (Opuntia ficus-indica – ინდური ოპუნცია) აგრომრეწველული ნარჩენებისგან მზადდება. პროექტის მიზანი ქიმიურ სასუქებზე დამოკიდებულების შემცირებაა.

იდალგოს შტატი, კერძოდ კი მეზკიტალის ველი, კაქტუსების წარმოების უმსხვილესი რეგიონია. მეცნიერებმა გადაწყვიტეს, გასხვლის შედეგად დარჩენილი მასა და არაკომერციული პროდუქცია სასუქად გადაემუშავებინათ. ეს მიდგომა ერთდროულად ორ პრობლემას აგვარებს: ამცირებს ნარჩენების რაოდენობას და სარგებელს მოუტანს იმავე სავარგულებს, სადაც ნედლეული მოიპოვება.

მკვლევართა განმარტებით, კაქტუსის ნარჩენები 95%-ზე მეტ წყალს შეიცავს, რაც მათ ანაერობული ფერმენტაციისთვის იდეალურ მასალად აქცევს. პროცესის განმავლობაში მიკროორგანიზმები ორგანულ ნივთიერებებს გარდაქმნიან აირთა ნარევად (ძირითადად მეთანად და ნახშირორჟანგად). აღნიშნული მეთოდი საგრძნობლად ზოგავს წყლის რესურსს, რაც რეგიონისთვის კრიტიკულად მნიშვნელოვანია.

სამუშაო ჯგუფის ხელმძღვანელმა, სანტიაგო კრუზმა აღნიშნა, რომ პროექტის ერთ-ერთი მთავარი გამოწვევა ინფორმაციის ნაკლებობა იყო: „სწორი დოზირების შერჩევა რთული აღმოჩნდა. გარკვეულ ეტაპზე ორი მოსავალიც კი დავკარგეთ, რადგან ზუსტი პროპორციების დადგენა გვიჭირდა. თუმცა, კვლევების შედეგად დავამტკიცეთ, რომ ეს ბიოსასუქი ოპტიმალურია კულტურებისთვის თავისი ეფექტურობისა და ეკოლოგიური უპირატესობების გამო.“

შეგახსენებთ, რომ 2025 წლის ნოემბერში მექსიკის დეპუტატთა პალატამ დაამტკიცა ცვლილებები „სოფლის მეურნეობის მდგრადი განვითარების შესახებ“ კანონში. რეფორმა მიზნად ისახავს ბიოსასუქებისა და ბიოპესტიციდების გამოყენების წახალისებას, რაც ხელს შეუწყობს ნიადაგის, წყლის რესურსების დაცვას და პროდუქციის ხარისხის ამაღლებას.

კონგრესმენ ალონსო დე ხესუს ვასკესის განცხადებით, ბიოტექნოლოგიური რესურსების გამოყენება თანამედროვე სოფლის მეურნეობის ერთ-ერთი ყველაზე მნიშვნელოვანი მიღწევაა.

ბიოპესტიციდები, ქიმიური ანალოგებისგან განსხვავებით, ნაკლებად იწვევენ მავნებლების რეზისტენტობას და ხელს უწყობენ ბუნებრივი ბიოლოგიური კონტროლის მექანიზმების შენარჩუნებას.

ახალი რეფორმის წყალობით, მექსიკის სახელმწიფო მიიღებს სამართლებრივ ბერკეტებს, რათა დააფინანსოს სამეცნიერო კვლევები და უზრუნველყოს ფერმერთა გადამზადება ინოვაციური ბიოსასუქების გამოსაყენებლად.

წყარო: Mexico Business News