„ბოლერო და კომპანი“
„ბოლერო და კომპანი“ საქართველოს მასშტაბით რამდენიმე საწარმოს აერთიანებს და რთველი 2024 პროგრამის ფარგლებში ყურძნის მიღება-გადამუშავებას ასევე რამდენიმე ადგილზე ახორციელებს.
,,კომპანიის ქარხნები სრული სიმძლავრით მუშაობს. ჯამური სიმძლავრე საათში 800-დან 1000 ტონამდე ყურძნის გადამუშავებაა. თუ იქნება მოსავლის დიდი რაოდენობა, კომპანიას აქვს ყველანაირი ტექნიკური საშუალება იმისათვის, რომ შეუფერხებლად ჩაიბაროს ყურძენი”, – ამბობს კომპანიის გენერალური დირექტორ ირაკლი ბექაური.
დღეის მონაცემებით, კომპანიამ „ბოლერო და კომპანი“ მოსახლეობისგან უკვე მიიღო და გადაამუშავა 5,6 ათას ტონამდე ყურძენი და ჩაბარების პროცესს აგრძელებს.
„კომპანია დიდ რესურსებს დებს ბაზრების დივერსიფიცირების მიმართულებით, ვმუშაობთ ევროკავშირის ქვეყნებში ექსპორტის გაზრდაზე; საფრანგეთსა და ესპანეთში გაგვაქვს ღვინო, ვმუშაობთ ამერიკის ბაზარზე, წარმოდგენილი ვართ დიდი ბრიტანეთის ბაზარზეც; ჩვენი მარკეტინგი მუდმივად მუშაობს ახალი ბაზრების მოძიების მიმართულებით’’, – ამბობს ირაკლი ბექაური.
კომპანია „ბოლერო და კომპანი“ ღვინის ექსპორტს 10-ზე მეტ ქვეყანაში, მათ შორის, საფრანგეთში, ესპანეთში, გერმანიაში, იტალიაში, ავსტრიაში, პოლონეთსა და ჩინეთში ახორციელებს.
სახელმწიფო რთველის სუბსიდირებას წლეულსაც ახორციელებს. პრემიერ-მინისტრის გადაწყვეტილებით, მევენახე ფერმერებისთვის 1 კგ საფერავის ჯიშის ყურძნის ჩაბარება 1.50 ლარად არის შესაძლებელი. ამასთან ერთად, მევენახეებს, რომლებსაც დღემდე ლარნახევარზე ნაკლებ ფასად აქვთ ჩაბარებული საფერავის ჯიშის ყურძენი, საქართველოს მთავრობა დაუკომპენსირებს სხვაობას ლარნახევარსა და მიღებულ საფასურს შორის.