მცენარე-ტერმინატორი – რატომ არის იაპონური მაყვალი (Polygonum) სახიფათო მცენარე

ეს მცენარე სანერგეებში არ იყიდება. მას ყველაზე მოულოდნელ ადგილებში შეხვდებით: ასფალტიდან, ბეტონიდან და შენობების საძირკვლებიდან ამოსულს. იაპონური მაყვალი (Reynoutria japonica) ბუნების დაცვის საერთაშორისო ორგანიზაციის მიერ ევროპაში ყველაზე დესტრუქციულ ინვაზიურ მცენარედ არის კლასიფიცირებული.

იმის მიუხედავად, რომ საქართველოში ის ჯერ კიდევ არ არის გავრცელებული,  ჩრდილოეთ ამერიკისა და ევროპის გამოცდილება გვაჩვენებს, რომ მისი უყურადღებოდ დატოვება ნებისმიერი ბაღისა თუ ფერმისთვის კატასტროფის ტოლფასია.

რატომ არის საშიში?

• მისი ფესურები (რიზომები) მიწაში 3 მეტრის სიღრმეზე ჩადის და ჰორიზონტალურად 7 მეტრზე ვრცელდება. მის ფესვებს შესწევს ძალა, გაარღვიოს ასფალტის და ბეტონის სქელი ფენა, შენობის საძირკველიც კი. გაზაფხულზე ფესვები დღეში 2 სანტიმეტრით იზრდება.
• ფესურას სულ რაღაც 1-სანტიმეტრიანი ნაწილიც  კი საკმარისია, რომ ახალი მცენარე წარმოიქმნას. ნებისმიერი მექანიკური მცდელობა მისი მოცილებისა (ბარი, მოტოკულტივატორი, ექსკავატორი) მხოლოდ ამრავლებს პრობლემას, რადგან დაქუცმაცებული ფესვები მთელ ტერიტორიაზე იფანტება.
• გაზაფხულზე მცენარე ისეთი სისწრაფით იზრდება, რომ სეზონზე ნულიდან 3-4 მეტრს აღწევს.

როგორ ვიცნოთ იაპონური მაყვალი?

• ღერო: შიგნით ცარიელი (ღრუ) და წითელი ლაქებით არის დაფარული, ძალიან ჰგავს ბამბუკს.
• ფოთლები: დიდი, გულის ფორმის, სწორი (მოჭრილი) ფუძით.
• სეზონურობა: ზამთარში მიწისზედა ნაწილი მთლიანად კვდება, თუმცა მიწისქვეშა ფესვები ხელუხლებელი რჩება და ახალ სეზონს ელოდება.

როგორ ხვდება ის ბაღებში?

ყველაზე ხშირად ის ვრცელდება სამშენებლო სამუშაოების შემდეგ დარჩენილი „დაბინძურებული“ მიწით, შეუმოწმებელი კომპოსტით ან ხშირად მებოსტნეებს ის დეკორატიული ბამბუკი ჰგონიათ და თავადვე რგავენ.

რა უნდა გავაკეთოთ?

თუ თქვენს ნაკვეთზე შენიშნეთ მცენარე ამ მახასიათებლებით, არ შეეხოთ მას! არ სცადოთ მისი ამოთხრა ან დაჭრა. გადაუღეთ ფოტო, მოახდინეთ მისი ზუსტი იდენტიფიკაცია და აუცილებლად მიმართეთ რეგიონულ ფიტოსანიტარულ სამსახურს.

იაპონური მაყვალი არ არის უბრალო სარეველა; ის ინფრასტრუქტურული საფრთხეა.

ადგილებზე, სადაც ეს მცენარე ვრცელდება, უძრავი ქონების ფასი მკვეთრად ეცემა.

ამიტომ საჭიროა ბიოუსაფრთხოების წესების დაცვა, რაც დაგიზოგავთ ათასობით ლარსა და გაგანთავისუფლებთ მძიმე შრომისგან.

მასალა მომზადებულია საერთაშორისო ფიტოსანიტარული  ინფორმაციების საფუძველზე