ტანას ხეობაში ველურ ბუნებაში 300 ფრთა გნოლი და კაკაბი გაუშვეს

ველური ფაუნის გამრავლებისა და ბიომრავალფეროვნების შენარჩუნების მიზნით, გორის მუნიციპალიტეტში, ტანას აღკვეთილის ტერიტორიაზე, 150 ფრთა გნოლი და 150 ფრთა კაკაბი გაუშვეს. ინიციატივა ველური ბუნების ეროვნული სააგენტოს მხარდაჭერით განხორციელდა.

ტანას აღკვეთილის ტერიტორია გნოლისა და კაკბის ბინადრობისა და გამრავლებისთვის ხელსაყრელი ბუნებრივი პირობებით გამოირჩევა. ფრინველების ველურ გარემოში გაშვების მიზანია მათი პოპულაციების გამრავლების ხელშეწყობა, ბუნებრივ არეალში გავრცელება და საქართველოს ველური ფაუნის მრავალფეროვნების შენარჩუნება.

გნოლები და კაკბები გორის მუნიციპალიტეტს საქველმოქმედო ფონდმა „ქართუმ“ საჩუქრად გადასცა. ფონდი ბიძინა ივანიშვილისა და მისი ოჯახის მხარდაჭერით წლების განმავლობაში აფინანსებს იშვიათი და უნიკალური ფრინველების გამრავლებასა და მათ შემდგომ ველურ ბუნებაში გაშვებას.

ამ საქმიანობის ერთ-ერთი მნიშვნელოვანი მიმართულებაა წითელ ნუსხაში შეტანილი კოლხური ხოხბის გამრავლება და ბუნებრივ გარემოში დაბრუნება. აღნიშნული ინიციატივის ფარგლებში საქართველოს ველურ ბუნებაში უკვე რამდენიმე ათასი ხოხობი, კაკაბი და გნოლი გაუშვეს.

ბიომრავალფეროვნების დაცვა ბუნებრივი რესურსების მდგრადი მართვის მნიშვნელოვანი ნაწილია. ველურ ბუნებაში ფრინველების გაშვება ამ მიზნის მიღწევის ერთ-ერთი გზაა, თუმცა გრძელვადიანი შედეგისთვის აუცილებელია მათი შემდგომი მონიტორინგი, საბინადრო გარემოს დაცვა და პოპულაციების გამრავლებისთვის ხელსაყრელი პირობების შენარჩუნება.