საერთაშორისო მისია თხილის სექტორის გადასარჩენად _ თურქი მეცნიერების კვლევები დასავლეთ საქართველოში

საქართველოს ერთ-ერთი ყველაზე მნიშვნელოვანი საექსპორტო და სოციალური მნიშვნელობის მქონე დარგი სერიოზული გამოწვევის წინაშე დგას.

დასავლეთ საქართველოს თხილის მწარმოებელ რეგიონებში ფიქსირდება მცენარეთა უეცარი ხმობის ტენდენცია, რომელიც საფრთხეს უქმნის როგორც ნარგავებს, ისე ათასობით ფერმერის ეკონომიკურ მდგრადობას.

ამ კრიტიკული პრობლემის შესასწავლად და ეფექტიანი პრევენციული მექანიზმების შესამუშავებლად, ქვეყანას თურქი მეცნიერების სპეციალური ჯგუფი ეწვია.

შავი ზღვის სოფლის მეურნეობის კვლევითი ინსტიტუტის (თურქეთი) ბაქტერიოლოგიის, მიკოლოგიისა და ვიროლოგიის წამყვანი სპეციალისტებისგან შემდგარი ოთხკაციანი დელეგაცია აჭარის, გურიისა და სამეგრელო-ზემო სვანეთის რეგიონებს ესტუმრა. აღნიშნული ვიზიტი და ნიმუშების შეგროვების პროცესი გაეროს სურსათისა და სოფლის მეურნეობის ორგანიზაციის (FAO) მხარდაჭერითა და თურქეთის თანამშრომლობისა და კოორდინაციის სააგენტოსთან (TiKA) თანამშრომლობით განხორციელდა.

აღსანიშნავია, რომ ეს აქტივობა ორგანულად ებმება FAO-ს მიმდინარე მხარდაჭერას, რომელიც ევროკავშირის ENPARD IV პროგრამის ფარგლებში ხორციელდება. ინიციატივა მიზნად ისახავს ფერმერების გადამზადებას, ცოდნის გაზიარებას და ტექნიკაზე ხელმისაწვდომობის გაუმჯობესებას წარმოების ეფექტიანობის, სურსათის უვნებლობისა და კონკურენტუნარიანობის ასამაღლებლად.

ვიზიტის ფარგლებში მნიშვნელოვანი ტექნიკური შეხვედრები გაიმართა ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტთან, სოფლის მეურნეობის სამეცნიერო-კვლევით ცენტრთან (SRCA) და კომპანია აგრიჯორჯიასთან (Ferrero-ს თხილის მიმართულება). მხარეებმა ერთობლივი ძალისხმევისა და მონაცემთა გაცვლის მნიშვნელობაზე ისაუბრეს.

საქართველოს თხილის სექტორის მასშტაბები და სოციალური დატვირთვა ცხადყოფს, რომ თითოეული მცენარის ჯანმრთელობა ქვეყნის მაკროეკონომიკური სტაბილურობის ნაწილია. დარგი მოიცავს დაახლოებით 58 000 ჰექტარს და საარსებო წყაროს უზრუნველყოფს თითქმის 72 000 ფერმერული შინამეურნეობისთვის მთელი ქვეყნის მასშტაბით. შესაბამისად, უეცარი ხმობის მსგავსი გავრცელებული პათოლოგიები არა მხოლოდ ცალკეული მეურნეობების ზარალია, არამედ რეგიონული მასშტაბის გამოწვევაა.

მოცემულ ეტაპზე გადამწყვეტი მნიშვნელობა ენიჭება მომდევნო ნაბიჯებს: შეგროვებული ნიმუშების ლაბორატორიულ ანალიზსა და პათოგენების ზუსტ იდენტიფიკაციას თურქეთში. კვლევის შედეგებზე დაყრდნობით, მეცნიერები შეიმუშავებენ მტკიცებულებებზე დაფუძნებულ რეკომენდაციებს, რაც ფერმერებს ხმობის მართვისა და ბაღების დაცვის ეფექტიან მექანიზმებს შესთავაზებს. საერთაშორისო თანამშრომლობა, ადგილობრივი სამეცნიერო პოტენციალის გაძლიერება და დროული პრევენციული ღონისძიებები ქართული თხილის სექტორის გრძელვადიანი მდგრადობისა და მაღალი კონკურენტუნარიანობის მთავარი გარანტია.

  მომზდდა FAO Georgia-ს   მასალების მიხედვით