დედამიწის დღე _ ზრუნვა საერთო სახლზე და მომავალი თაობების ეკო-განათლება

22 აპრილს მსოფლიო დედამიწის დღეს აღნიშნავს – თარიღს, რომელიც გვახსენებს ჩვენს პასუხისმგებლობას ბუნების წინაშე. აგრარულ სექტორში გარემოს დაცვა და რესურსების გონივრული მართვა წარმატების ქვაკუთხედია.

წლეულს ეს მნიშვნელოვანი დღე საქართველოში განსაკუთრებული აქტივობითა და მომავალ თაობაზე ორიენტირებული პროექტებით აღინიშნა.

დედამიწის დღე გარემოს დაცვისადმი მიძღვნილი საერთაშორისო დღეა, რომლის ისტორია 1970 წლიდან, ამერიკის შეერთებული შტატებიდან იწყება. სენატორ გეილორდ ნელსონის ინიციატივამ საფუძველი ჩაუყარა გლობალურ მოძრაობას, რომლის მიზანიც პლანეტის ეკოსისტემების შენარჩუნება და გარემოსდაცვითი პრობლემების შესახებ საზოგადოების ინფორმირებაა. დღეს ეს დღე 190-ზე მეტ ქვეყანაში აღინიშნება და საერთო მიზნის გარშემო მილიონობით ადამიანს აერთიანებს.

დედამიწის დღესთან დაკავშირებით, გარემოს დაცვისა და სოფლის მეურნეობის სამინისტროს ეროვნული სატყეო სააგენტოს ინიციატივით, საგარეჯოს მუნიციპალიტეტის N1 საჯარო სკოლაში მნიშვნელოვანი ღონისძიება გაიმართა.

შეხვედრის მთავარი თემა იყო „ტყე და დედამიწა“. მოსწავლეებმა წარმოადგინეს პრეზენტაციები, სადაც განიხილეს ტყის ეკოსისტემების სასიცოცხლო მნიშვნელობა, კლიმატის ცვლილებასთან ბრძოლის გზები და ბიომრავალფეროვნების დაცვის აუცილებლობა.

„საზოგადოების გარემოსდაცვითი ცნობიერების ამაღლებისთვის განსაკუთრებული მნიშვნელობა აქვს ახალგაზრდების დაინტერესებას და მათ აქტიურობას. პროფესიული განათლების ხელშეწყობა და დარგში ახალგაზრდა კადრების მოზიდვა სატყეო რეფორმის ერთ-ერთ ძირითად კომპონენტს წარმოადგენს,“ – განაცხადა ეროვნული სატყეო სააგენტოს უფროსმა, ბესიკ ამირანაშვილმა.

თეორიული ცოდნის პარალელურად, ღონისძიებას პრაქტიკული დატვირთვაც ჰქონდა. სკოლის მიმდებარე ტერიტორიაზე სიმბოლურად 22 ტუიას სახეობის ნერგი დაირგო. აღსანიშნავია, რომ ნერგების შემდგომ მოვლა-პატრონობაზე პასუხისმგებლობა თავად მოსწავლეებმა აიღეს, რაც ხელს უწყობს მათში გარემოზე ზრუნვის კულტურის ჩამოყალიბებას.

დედამიწის დღის აღნიშვნა მხოლოდ ერთი დღის აქტივობა არ არის; ეს არის შეხსენება იმისა, რომ ტყის ეკოსისტემების დაცვა და შენარჩუნება თითოეული ჩვენგანის ვალია.

აგრარული დარგის განვითარება წარმოუდგენელია ჯანსაღი გარემოს გარეშე. მსგავსი ინიციატივები, სადაც სახელმწიფო სტრუქტურები და ახალგაზრდები ერთად მოქმედებენ, იმედს იძლევა, რომ მომავალში კიდევ უფრო მეტი ადამიანი გაითავისებს ეკოლოგიური პასუხისმგებლობის მნიშვნელობას ჩვენი ქვეყნის მდგრადი განვითარებისთვის.