გარემოს დაცვის მსოფლიო დღე და საქართველო
დღეს, როდესაც კლიმატის ცვლილება და ეკოლოგიური გამოწვევები კაცობრიობის წინაშე არსებულ უმთავრეს პრობლემად იქცა, დედამიწაზე ზრუნვა თითოეული ჩვენგანის ყოველდღიური მოვალეობაა.
5 ივნისს მსოფლიო გარემოს დაცვის საერთაშორისო დღეს აღნიშნავს – თარიღს, რომელიც კიდევ ერთხელ გვახსენებს ბუნებასთან ჰარმონიული თანაცხოვრების აუცილებლობას.
წლეულს საქართველო ამ გლობალურ ინიციატივას არაერთი მასშტაბური და პრაქტიკული აქტივობით შეუერთდა, რომელთა მიზანიც საზოგადოების ცნობიერების ამაღლება და კონკრეტული ნაბიჯების გადადგმაა.
ეკოლოგიური აქტივობების ფარგლებში, ეროვნული სატყეო სააგენტოს ინიციატივით, მცხეთა-მთიანეთის რეგიონში, კერძოდ კი სოფელ თვალივში, სახელმწიფო ტყის მასივში დასუფთავების მასშტაბური აქცია მოეწყო.
აღსანიშნავია, რომ ამ მწვანე ინიციატივამ სხვადასხვა სფეროს წარმომადგენლები გააერთიანა. ტყის საფრის დასუფთავებაში აქტიურად ჩაერთნენ:
- ჟურნალისტები;
- მომღერლები და ხელოვნების სფეროს წარმომადგენლები;
- სპორტსმენები.
ამგვარი ერთობლივი ძალისხმევა ხაზს უსვამს იმას, რომ ბუნებაზე ზრუნვა საერთო პასუხისმგებლობაა და მასში საზოგადოების ყველა ფენის ჩართულობა სასიცოცხლოდ მნიშვნელოვანია.
გარემოს დაცვის მსოფლიო დღე 1973 წლიდან, გაერთიანებული ერების ორგანიზაციის ინიციატივით იმართება. ყოველწლიურად ეს დღე რომელიმე აქტუალურ ეკოლოგიურ გამოწვევას ეძღვნება.
2026 წლის მთავარი გზავნილია _ „ბუნებით შთაგონებული კლიმატისთვის, ჩვენი მომავლისთვის“.
ამ გზავნილის მთავარი არსი იმაში მდგომარეობს, რომ კლიმატის ცვლილებასთან ბრძოლის საუკეთესო გზები ხშირად თავად ბუნებაშივეა საპოვნელი და სწორედ ეკოსისტემების შენარჩუნებაა ჩვენი მომავალი თაობების კეთილდღეობის გარანტი.
მხოლოდ დასუფთავების აქციებით გარემოსდაცვითი პრობლემების მოგვარება შეუძლებელია, ამიტომ საქართველოში აქცენტი გრძელვადიან პროექტებზეც გაკეთდა. ამ თარიღთან დაკავშირებით ორი უმნიშვნელოვანესი ღონისძიება დაიგეგმა:
- კლიმატის ცვლილებასთან ადაპტაციის საქართველოს ეროვნული გეგმის (NAP) პროექტის გახსნა _ ეს არის სტრატეგიული ნაბიჯი, რომელიც ქვეყანას დაეხმარება კლიმატური რყევების მიმართ უფრო მდგრადი გახდეს (მათ შორის აგრარულ სექტორში).
- „განათლება მწვანე მომავლისთვის“ _ ამ პროექტის ფარგლებში გაიმართება საუკეთესო პედაგოგების დაჯილდოება, რომლებიც განსაკუთრებულ საქმეს აკეთებენ მომავალ თაობაში ეკო-ცნობიერების ასამაღლებლად.
გარემოს დაცვის მსოფლიო დღე არ არის მხოლოდ კალენდარული თარიღი – ეს არის შეხსენება, რომ სუფთა წყალი, ჯანსაღი ნიადაგი და მწვანე ტყეები ჩვენი არსებობის საფუძველია, რაც პირდაპირ კავშირშია მდგრად სოფლის მეურნეობასა და აგრარულ სიძლიერესთან. სახელმწიფო უწყებების, სამოქალაქო სექტორისა და საზოგადოებრივი სახეების ერთობლივი მუშაობა, ასევე საგანმანათლებლო და სტრატეგიული პროექტების დაწყება იმედს აჩენს, რომ საქართველო მყარად ადგას „მწვანე მომავლის“ შენების გზას. ბუნებაზე ზრუნვა ხომ საკუთარ თავზე ზრუნვით იწყება.