აჭარაში მეფუტკრე ფერმერებისათვის სკების გადაცემის პროცესი დაიწყო
მეფუტკრეობის განვითარების ხელშეწყობის პროგრამა რეგიონში ფუტკრის ოჯახების გამრავლებასა და ადგილობრივი ფერმერების საწარმოო შესაძლებლობების გაძლიერებას ისახავს მიზნად.
აჭარის სოფლის მეურნეობისა და გარემოს დაცვის სამინისტროს ა(ა)იპ აგროსერვის ცენტრის „მეფუტკრეობის განვითარების ხელშეწყობის“ ქვეპროგრამის ფარგლებში, მეფუტკრე ფერმერებისთვის სკების გადაცემის პროცესი დაიწყო. პროგრამა აჭარის ყველა მუნიციპალიტეტში ხორციელდება და ჯამში ფერმერებისთვის 2 000 სკის გადაცემას ითვალისწინებს.
სკების განაწილების პროცესს ქედის მუნიციპალიტეტში აჭარის სოფლის მეურნეობისა და გარემოს დაცვის მინისტრი დენის სალუქვაძე დაესწრო. მინისტრი ადგილობრივ მეფუტკრე ფერმერებს შეხვდა და დარგის განვითარების მხარდამჭერ პროგრამებსა და სამომავლო გეგმებზე ისაუბრა.
პროგრამის ფარგლებში, ქედის მუნიციპალიტეტში მეფუტკრე ფერმერებს დაახლოებით 550 სკა გადაეცემათ. ქვეპროგრამის განხორციელება აჭარის რეგიონის ყველა მუნიციპალიტეტშია გათვალისწინებული.
დენის სალუქვაძის განცხადებით, მეფუტკრეობა აჭარის სოფლის მეურნეობის ერთ-ერთი მნიშვნელოვანი მიმართულებაა და მისი განვითარება სამინისტროს პრიორიტეტებს შორისაა. მხარდაჭერის მიზანია ადგილობრივი მეფუტკრეების გაძლიერება, წარმოების განვითარება და ფუტკრის ოჯახების გამრავლების ხელშეწყობა.
შეხვედრაზე ფერმერებს სოფლის მეურნეობის სფეროში მოქმედი სხვა მხარდამჭერი პროგრამებიც გააცნეს. სამინისტროს ინფორმაციით, აღნიშნული ინიციატივები ადგილობრივი ფერმერებისთვის დამატებითი შესაძლებლობების შექმნასა და მათი საქმიანობის განვითარებას ემსახურება.
მეფუტკრეებისთვის სკების გადაცემა მხოლოდ მატერიალური დახმარება არ არის, ის ხელს შეუწყობს მეურნეობის გაფართოებას, ფუტკრის ოჯახების რაოდენობის ზრდასა და თაფლის წარმოების განვითარებას. განსაკუთრებით მნიშვნელოვანია მსგავსი პროგრამები მცირე ფერმერებისთვის, რომელთათვის ახალი სკების შეძენა შესაძლოა დამატებით ფინანსურ ტვირთს წარმოადგენდეს.
აჭარის მუნიციპალიტეტებში მეფუტკრეობის მხარდაჭერას დიდი მნიშვნელობაც აქვს. ფუტკრის ოჯახების გამრავლება და მეფუტკრეობის საქმიანობის გაძლიერება ხელს შეუწყობს სოფლის მოსახლეობის შემოსავლის დივერსიფიკაციას, ადგილობრივი პროდუქციის წარმოებასა და სოფლის ეკონომიკურ გაძლიერებას.
ამასთან, სკების გადაცემის ეფექტიანობა დამოკიდებულია არა მხოლოდ ინვენტარის რაოდენობაზე, არამედ ფერმერებისთვის ცოდნის, ვეტერინარული და ტექნოლოგიური კონსულტაციების, დაავადებების კონტროლისა და პროდუქციის რეალიზაციის შესაძლებლობების უზრუნველყოფაზეც. სწორედ ამ მიმართულებების ერთობლივი მხარდაჭერა შექმნის პირობებს, რომ პროგრამის შედეგები ერთჯერად დახმარებას გასცდეს და მეფუტკრეობის მდგრად განვითარებაში გადაიზარდოს.