ლურჯი ეკონომიკის პოტენციალი _ „თევზისა და ზღვის პროდუქტების ფესტივალი 2026“ ბათუმში
საქართველოს აგრარულ სექტორში მეთევზეობისა და აკვაკულტურის დარგების განვითარებას სტრატეგიული მნიშვნელობა აქვს ქვეყნის სასურსათო უსაფრთხოების და საექსპორტო პოტენციალის განვითარების თვალსაზრისით.
ქვეყნის უნიკალური წყლის რესურსები და შავი ზღვის სანაპირო ზოლი იძლევა იმის შესაძლებლობას, რომ თევზის წარმოება არა მხოლოდ ადგილობრივი ბაზრის მომარაგების, არამედ საექსპორტო პოტენციალის ზრდისა და რეგიონული ეკონომიკის გაძლიერების მძლავრ მამოძრავებლად იქცეს. ამ მიზნით, დარგის პოპულარიზაციასა და ფერმერების მხარდაჭერას განსაკუთრებული როლი ენიჭება.
ბათუმის ბულვარის მიმდებარე ტერიტორიაზე გამართული „თევზისა და ზღვის პროდუქტების ფესტივალი 2026“ სწორედ ამ დარგობრივი წინსვლის დემონსტრირება იყო. ღონისძიებას, რომლის ორგანიზატორიც „ორგანული აკვაკულტურის ასოციაცია „ფორეჯი“ გახლდათ, მაღალი დონის ოფიციალური პირები დაესწრნენ, მათ შორის აჭარის მთავრობის თავმჯდომარე ზურაბ პატარაძე, სოფლის მეურნეობისა და გარემოს დაცვის მინისტრი დენის სალუქვაძე, უმაღლესი საბჭოს თავმჯდომარე ცოტნე ანანიძე და ბათუმის მერი გიორგი ცინცაძე.
„რეგიონში მეთევზეობისა და აკვაკულტურის დარგების პოპულარიზაცია და მათი განვითარების ხელშეწყობა აჭარის სოფლის მეურნეობისა და გარემოს დაცვის სამინისტროს ერთ-ერთ მთავარ პრიორიტეტს წარმოადგენს.“ _ დენის სალუქვაძე, აჭარის სოფლის მეურნეობისა და გარემოს დაცვის მინისტრი.
ფესტივალი საუკეთესო პლატფორმა გამოდგა B2B (ბიზნესი ბიზნესისთვის) კავშირების დასამყარებლად და დარგობრივი ცნობიერების ასამაღლებლად. პროგრამა მრავალფეროვანი აქტივობებისგან შედგებოდა:
- კულინარიული შოუები და ადგილობრივი რესტორნების მიერ მომზადებული ზღვის პროდუქტების დეგუსტაცია;
- საინფორმაციო პრეზენტაციები თევზის კვებითი ღირებულებისა და ჯანსაღი კვების წესების შესახებ;
- სპორტული და სამოყვარულო თევზჭერის დემონსტრირება.
ღონისძიებაში აქტიურად მონაწილეობდნენ ადგილობრივი ფერმერული მეურნეობები, რეალიზატორები, პროფესიული კოლეჯები და დარგობრივი ორგანიზაციები, რაც ხაზს უსვამს განათლებისა და პრაქტიკის სინთეზის მნიშვნელობას აგრარულ ბიზნესში.
ფესტივალის წარმატებით განხორციელებას მხარი დაუჭირეს აჭარის მთავრობამ, ქალაქ ბათუმის მერიამ, ხელვაჩაურის კულტურის ცენტრმა და ბათუმის ბულვარმა.
ბათუმის თევზის ფესტივალი მხოლოდ სადღესასწაულო ღონისძიება არ არის; ეს არის მკაფიო სიგნალი იმისა, რომ საქართველო იწყებს საკუთარი წყლის რესურსების უფრო ეფექტურ ათვისებას.
აკვაკულტურის განვითარება ხელს უწყობს როგორც სასურსათო უსაფრთხოებას, ისე ახალი სამუშაო ადგილების შექმნას რეგიონებში. სახელმწიფო უწყებების, ასოციაციებისა და კერძო სექტორის ასეთი კოორდინირებული მუშაობა საფუძველს უყრის თანამედროვე, ევროპული სტანდარტების მქონე მეთევზეობის ინდუსტრიის ჩამოყალიბებას საქართველოში.