საჩხერეში ფიჭვის კულტურების სანიტარიული მდგომარეობის გაუმჯობესების ღონისძიებები მიმდინარეობს

საჩხერის სატყეო უბანზე ფიჭვის კულტურების სანიტარიული მდგომარეობის გაუმჯობესების მიზნით ეროვნული სატყეო სააგენტო სანიტარიულ ჭრებს ახორციელებს.

ღონისძიების მთავარი მიზანია დაზიანებული და ზეხმელი ხეების ტერიტორიიდან გატანა, მავნებლების შესაძლო გავრცელების პრევენცია და ტყის ხანძრის რისკის შემცირება.

ეროვნული სატყეო სააგენტოს ინფორმაციით, საჩხერის სატყეო უბანზე ფიჭვის კულტურების მდგომარეობის შესწავლისას სპეციალისტებმა ხეების ხმობისა და დაზიანების რამდენიმე შემთხვევა გამოავლინეს. ჩატარებული კვლევის შედეგად დადგინდა, რომ ფიჭვების დასუსტების ძირითად მიზეზს 2023 წელს ძლიერი სეტყვის შედეგად მიღებული დაზიანებები წარმოადგენს.

სტიქიის შედეგად დაზიანებულმა ხეებმა მომდევნო წლებში სრულად აღდგენა ვერ შეძლეს, რის გამოც მათი ნაწილი მნიშვნელოვნად დასუსტდა და ხმობის პროცესი განვითარდა.

ამ ეტაპზე სპეციალისტების მიერ მასობრივი მავნებელ–დაავადების გავრცელების გამომწვევი ფაქტორი არ გამოვლენილა. თუმცა, დასუსტებულ ფიჭვებზე დაფიქსირდა ფიჭვის დიდი და პატარა მებაღის (Tomicus piniperda, Tomicus minor) სასვლელები. აღნიშნული მავნებლები ძირითადად დასუსტებულ და დაზიანებულ ხეებს აზიანებენ, ამიტომ მათი დროული გამოვლენა და ტყის სანიტარიული მდგომარეობის კონტროლი მნიშვნელოვანია.

„ფიტოსანიტარული მდგომარეობის გაუმჯობესების მიზნით, აღნიშნულ ფართობზე უკვე მიმდინარეობს სანიტარიული ჭრები, რაც ითვალისწინებს ტერიტორიიდან ზეხმელი და ძლიერ დაზიანებული ხეების გატანას. ეს ღონისძიებები მნიშვნელოვანია როგორც ფიჭვის კულტურების სანიტარიული მდგომარეობის გასაუმჯობესებლად, ისე მავნებლების შესაძლო გავრცელებისა და ტყის ხანძრის რისკის შესამცირებლად“, — განაცხადა ეროვნული სატყეო სააგენტოს უფროსმა, ბესიკ ამირანაშვილმა.

სანიტარიული ჭრები ტყის მართვის მნიშვნელოვანი ღონისძიებაა, რომლის მიზანიც მხოლოდ ხმელი ხეების მოცილება არ არის. დაზიანებული მასის დროული გატანა ამცირებს მავნე ორგანიზმებისთვის ხელსაყრელ პირობებს, აუმჯობესებს ტყის სანიტარიულ მდგომარეობას და ამცირებს ტყეში დიდი რაოდენობით მშრალი ბიომასის დაგროვებით გამოწვეულ ხანძრის საფრთხეს.

საჩხერის სატყეო უბანი სპეციალისტების მუდმივი მონიტორინგის ქვეშ რჩება. სანიტარიული ღონისძიებების დასრულების შემდეგ ეროვნული სატყეო სააგენტო აღნიშნულ ტერიტორიაზე ტყის აღდგენის ღონისძიებებს განახორციელებს.

საჩხერის მაგალითი კიდევ ერთხელ აჩვენებს, რამდენად მნიშვნელოვანია ტყის ეკოსისტემების მდგომარეობაზე სტიქიური მოვლენების შემდეგ ხანგრძლივი მონიტორინგი.

სეტყვის მსგავსი ძლიერი ბუნებრივი მოვლენით მიყენებული დაზიანება შესაძლოა ხეების ხმობით მაშინვე არ დასრულდეს — დასუსტებული მცენარეები მომდევნო წლებში უფრო მიმღები ხდება მავნებლებისა და სხვა სტრესული ფაქტორების მიმართ. შესაბამისად, სანიტარიული ჭრები, ფიტოსანიტარიული მონიტორინგი და შემდგომი ტყის აღდგენა ერთმანეთთან დაკავშირებული ღონისძიებების ერთიან სისტემად უნდა განიხილებოდეს.

განსაკუთრებით მნიშვნელოვანია, რომ აღდგენის ეტაპზე გათვალისწინებული იყოს ტერიტორიის ეკოლოგიური პირობები და ტყის მდგრადობის გაზრდის შესაძლებლობები.